El campus infantil y xuvenil “Branu con Arte” torna a la Factoría Cultural con 144 places y grupos de 5 a 16 años

La conceyalía de Cultura d’Avilés, al traviés de la Factoría Cultural, pon en marcha un añu más el campus artísticu infantil y xuvenil “Branu con Arte”, gracies al cual neñes, neños y adolescentes van poder esfrutar d’unes vacaciones distintes, actives, risonderes y creatives, al empar que se facilita a les families la conciliación cola vida llaboral.

Con trés propuestes y un total de 144 places, va desenvolvese en trés rioles, del 5 de xunetu al 13 d’agostu, favoreciendo la promoción, l’alcuentru y el fomentu de la creación artística al traviés de la esperimentación y la práctica activa, por aciu talleres impartíos por reconocíos profesionales del mundu del arte plástico, cerámicu, teatral o musical.

Destináu a neños, neñes y adolescentes d’ente 5 y 16 años (la edá mínima y máxima tendrá de tar cumplida na fecha en que s’empecipie l’actividá),  va incentivar el so interés escontra la espresión y la creatividá, con trés opciones: artes plástiques y gráfiques, de 5 a 9 y de 10 a 16 años, y artes escéniques, de 5 a 16 años..

Esta propuesta cultural va desenvolvese de llunes a vienres de 10.00 a 13.00 hores, en veces de diez díes y con 16 places en cada una, con 30 hores d’actividá, y respuende, coles mesmes, al compromisu del Conceyu d’Avilés d’ufiertar a les families con menores al so cargu xuna actividá que facilite la conciliación de la so vida personal, llaboral y familiar.

Más información