Inaugurada la VII Esposición d’Arte Postal n’Avilés, con más de 500 obres llegaes de too el mundu

La VII Esposición d’Arte Postal n’Avilés, con más de 500 obres llegaes de tol mundu, vieno acabante inaugurase esti mesmu lliunes.

Avilés convirtióse en referente internacional del conocíu como mail art o arte unviáu per corréu, gracies a la Esposición d’Arte Postal qu’algama la so séptima edición y que, sol lema “L’orixe”, va permanecer n’exhibición, con visita gratuita, hasta’l 17 de mayu.

Entamada pol Conceyu d’Avilés en collaboración con ANMivestigación, presidió l’actu de inauguración Yolanda Alonso, concejala de Cultura y Promoción de Ciudá, y Ricardo Fernández, coordinador de l’amuesa.

La Esposición Internacional d’Arte Postal n’Avilés, yá na so séptima edición, ye una plataforma mundial d’arte per corréu onde cientos de mailartistes depositen les sos obres y que tien una presencia destacada nes más importantes redes globales d’esti movimientu democráticu, creativu y cultural.

Una amuesa qu’amás de ser un aliciente pa creadores locales, conviértese nun exemplu d’interacción cultural, al xunir artistes procedentes de diversos y tan distintos llugares, que comparten un mesmu convencimientu. Evidencian, d’esta forma, la importancia qu’adquier la cultura como elementu d’integración y de socialización, d’argamasa pa la construcción de sociedaes más intelixentes, más solidaries, más creatives ya innovadores, y por tantu más crítiques y tolerantes.

Más información