Semando Son amuesa’l nuevu folk asturiano

Semando Son, ye’l títulu del primer compilatoriu de música moza n’asturianu, qu’editáu por musicasturiana.com inclúi tres cantares inéditos de caún de los cuatro grupos que tocó na primer edición del Semando Fest.

Yá ta en CD y en toles plataformes musicales Semando Son, el primer compilatoriu de música moza n’asturianu. Esti discu editáu por musicasturiana.com inclúi tres cantares inéditos de caún de los grupos que tocó na primer edición del Semando Fest el pasáu febreru: Alicia Villanueva y Luis Álvarez Pola, dos de los nomes nuevos de la tonada asturiana; Loína, tríu acústicu de folk atlánticu; Algaire, banda de música tradicional fusionada; y Llevólu’l Sumiciu, dúu qu’amesta música electrónica y asturiana.

Axúntense asina 12 temes d’estilos estremaos pa reflexar la diversidá sonora de la música’l país. La característica común ente tolos artistes ye que los sos componentes tienen menos de 35 años; d’esta manera, la iniciativa trata de puxar pol relevu xeneracional na música asturiana y promocionar los nomes nuevos d’esta escena.L’album grabóse’l pasáu xunetu nos Tutu Estudios de Corvera baxo la producción Sergio Rodríguez, el diseñu y maquetación ye obra de la ilustradora xixonesa Cecilia Diaz y la producción executiva ye de Xicu Ariza, responsable de musicasturiana.com.

El trabayu destaca tamién porque ufre los primeros temes grabaos d’Alicia Villanueva, Luis Álvarez Pola y de Loína, formaciones qu’enxamás pasaren pel estudiu de grabación; y porque recueye cantares que nun taben publicaos d’Algaire y Llevólu’l Sumiciu.

Tamién ye un discu que supón tou un viaxe pela música asturiana: entama per una interpretación de l’asturianada “Al Pasar El Puertu” -que grabó va 100 años La Busdonga– y acaba con sampleos electrónicos de vieyos y nuevos cantares de la música asturiana. Asina ye como pasáu, presente y futuru d’esta escena van de la mano nun álbum que tamién homenaxea a otros artistes al incorporar delles versiones -dende Desakato a Antoñita Moreno, pasando per Mapi Quintana y la banda sueca Hedningarna-, y nel que pueden sentise cantares nes dos llingües tradicionales d’Asturies.

El discu presentóse oficialmente’l sábadu 14 d’ochobre nel Reguerada Fest, la feria d’empreses, lliteratura, música, artes visuales y escéniques y gastronomía qu’entama la Viceconseyería de Cultura, Política Llingüística y Deporte. Nel actu participaron componentes de los cuatro grupos, amás del mentáu responsable de la iniciativa, que falaron sobre los cantares que grabaron, firmaron CDs y aldericaron sobre’l relevu xeneracional na música asturiana.

Pa siguir afondando nesto último, dende’l portal musicasturiana.com yá punxeron fecha a la segunda edición del festival Semando Fest: el 10 de febreru de 2024 van axuntase n’Uviéu otres cuatro propuestes musicales moces que van anunciase próximamente.