Portada Plástiques El tercer Ciclu d’Ilustración de la Ventana de la Factoría entra na recta final

El tercer Ciclu d’Ilustración de la Ventana de la Factoría entra na recta final

by redacción asturnews

El pasáu avientu’l tercer Ciclu d’Ilustración de la Ventana de la Factoría empezó la so andadura sol títulu “La ilustración y los sos procesos”. Esta tarde, de 19 a 22 hores, va entrar na recta final cola exhibición de la obra de la penúltima artista, la corverana Cinthya Álvarez, que podrá visualizase hasta’l llunes 24 d’abril.

Mientres esti ciclu, comisariáu por Raquel Llagartos, los y les diseñadores espunxeron una ilustración y proyectaron un vídeu qu’amosó al públicu los aspeutos ocultos de la creación artística. Va cerrar el ciclu Alicia Varela.

Na so ilustración pa la Ventana de la Factoría, Cinthya Álvarez quería ” faer daqué que pudiera conectar con casi tol mundu: la idea de que les nueses pasiones pueden acompañanos en cualquier momentu de la nuesa vida”, esplicó la diseñadora gráfica.

Natural de Corvera d’Asturies, estudió diseñu gráficu na Escuela Cimera d’Arte del Principáu d’Asturies. La so pasión pola ilustración ye-y innata, cualquier llugar yera bonu para aquella neña que dibuxaba personaxes y bisarmes sentada na cocina del chigre de los sos güelos, nos descansos del colexu o nos manteles de los restoranes.

Anguaño trabaya como ilustradora y diseñadora freelance. Aficionada a dar llargos paseos, tomar el café colos sos amigos y coleccionar revistes y fotografíes antigües, considérase xuna profesional versátil con munchos contrastes.

Tamién te podria gustar