La esposición “Cuerpos albentestate” recueye la creatividá reivindicativa d’Emma Lobato

La Casa de les Muyeres reafitó dende la so inauguración el so calter d’espaciu abiertu a les artistes locales y a la reivindicación del arte como elementu de tresformamientu de la sociedá. Y siguiendo esta sienda, inauguró una nueva esposición, “Cuerpos albentestate”, de la pintora y poeta avilesina Emma Lobato, que podrá visitase de forma gratuita hasta’l 12 de mayu.

“Cuerpos albentestate” recueye una serie de dibuxos de l’autora nacida n’A Coruña y criada nel barriu de Llaranes. Realizaes na técnica del grabáu, qu’afayó na Factoría Cultural, tantu en formatu de buecu como en relieve, acompañaos de los sos propios testos poéticos y narrativos.

Toles imaxes y los testos cunten con un llugar común: el cuerpu como llugar de conflictu. El cuerpu amenaciáu, el cuerpu invadíu, afrelláu, el cuerpu utilizáu como oxetu de comerciu. Pero tamién el cuerpu reivindicáu para l’esfrute y el placer, el cuerpu que ye vida, porque toles persones son cuerpu, con derechu a amosalo y a vivilo ensin prexuicios.

Nacida n’A Coruña en 1958, Emma Lobato Gómez vivió la so infancia en Llaranes, estudió nel Institutu Virxe de La Lluz y dempués na acabante crear Facultá de Filosofía y Ciencies de la Educación d’Uviéu. Ye llicenciada en Psicoloxía y doctora en Pedagoxía, realizando la so tesis doctoral sobro “La construcción de la identidá de xéneru al traviés de los xuegos infantiles”.

Anque desenvolvió la so vida llaboriar como docente, la so afición a la llectura, la escritura y la pintura vien de llueñe. Yá nos años 80 del pasáu sieglu realizó delles esposiciones. Ye, coles mesmes, integrante de llargu percorríu del Club de Llectura Xuna Habitación Propia, qu’entama la conceyalía d’Igualdá d’Avilés. En 2019 publicó’l so poemariu ilustráu “Versos Desflecados”. Na actualidá, yá xubilada, desenvuelve nel so procesu pictóricu les técniques del grabáu, como les obres que componen esta amuesa.