Portada Política Iniciativa reclama un mandatu marcu na RTPA

Iniciativa reclama un mandatu marcu na RTPA

by redacción asturnews

Na celebración, esti martes 21 de payares, del Día Mundial de la Televisión, Iniciativa pol Asturianu reclama un mandatu marcu qu’afite una presencia digna del idioma en RTPA y que garantice la ufierta de conteníos nes llingües propies.

Iniciativa pol Asturianu reclama a la Xunta Xeneral l’aprobación del mandatu marcu pa la Radio Televisión del Principáu d’Asturies (RTPA) como un pegoyu fundamental pa llograr una presencia digna del idioma nel ente públicu. La organización de reivindicación llingüística considera mui probe’l porcentaxe de programación n’asturianu, inesistente nel casu del eonaviego, y ve na televisión autonómica una ferramienta fundamental pa dar visibilidá al idioma pol so papel normalizador.

Pa Iniciativa pol Asturianu los medios de comunicación tienen un papel central a la hora de revertir l’actual procesu de minorización del asturianu y l’eonaviego, oxetivu qu’agora comparten la mayor parte de les fuercies polítiques con representación nel parllamentu asturianu. Nesi sen, la organización reclama a la dirección de RTPA qu’apueste definitivamente poles llingües propies y que trabaye pa que los medios de comunicación públicos se conviertan d’una vegada por toes nun axente principal de normalización con una presencia d’estes digna, tresversal y continuada.

La organización recuerda que yá treslladó les sos propuestes nesta materia a la viceconseyera de Cultura, Política Llingüística y Deportes, Ana Vanesa Gutiérrez, nun conceyu celebráu’l pasáu mes d’ochobre. Amás del desendolcu d’un mandatu marcu ambiciosu que recueya un incrementu progresivu de la programación nes llingües propies, Iniciativa pol Asturianu propunxo convertir la RPA nuna emisora 100% n’asturianu y eonaviego y la ellaboración d’un manual d’estilu qu’estableza l’usu de la toponimia tradicional de forma prioritaria tanto na espresión oral como per escrito en tolos programes y soportes de RTPA.

Nel Día Mundial de la Televisión, la entidá fai un llamáu a les fuercies polítiques pa trabayar nun consensu que dé una presencia digna a les llingües nos medios públicos de comunicación y procure una presencia tresversal y continua na programación de tolos canales de RTPA. Pidimientos que se faen estensibles al centru territorial de RTVE n’Asturies.

 

 

 

 

 

 

 

Tamién te podria gustar