Tunick desnuda a más de mil persones en Valencia

Unes 1.300 persones esnudáronse frente a les Torres de Serranos de Valencia énte’l fotógrafu Spencer Tunick, quien quixo amosar una analoxía ente un edificiu antiguu y les nueves relaciones ente homes y muyeres “escontra un camín más igualitariu, reconstruyendo mentes y corazones”.

La iniciativa, titulada “València, pell del Mediterrani”, foi posible gracies al trabayu conxuntu de l’asociación Intramurs y delles insticuciones como la dirección xeneral de Cultura y Patrimoniu de la Generalitat, la Conceyalía de Turismu del Conceyu de València, Fundación Turismo Valencia y la collaboración del CCCC-Centre del Carme Cultura Contemporània.

Les persones que s’inscribieren primeramente fueron convocaes a les cinco de la mañana d’esti sábadu nel CCCC, onde’l fotógrafu norteamericanu dio-yos les instrucciones pal allugamientu nes instantánees, según informaron fontes de la organización. Darréu, dirixiéronse pola cai Roteros hasta les Torres de Serrano, onde’l fotógrafu tenía dispuesta xuna grúa elevadora dende la que dio ordes, según les cualos los participantes asitiáronse de trés maneres distintes, pero en toes apreciábase xuna gran visibilización de les muyeres, una y bones el proyectu buscaba amosar el so empoderamiento.

De siguío, fixéronse otres dos instantánees más, na otra cara de les Torres -la Plaza de los Fueros- y, finalmente Tunick quedóse a soles colos homes, a los que fotografió na cai Roteros, y depués coles muyeres, n’un ficus centenariu cercanu a les Torres.

Tunick amosóse bien satisfechu pola gran implicación de la ciudadanía ya instituciones, ente que la directora del festival Intramurs, Salvia Ferrer, destacó “la maxa” que se creó mientres tol procesu.