Maribel Xixón espón “De puertes adientro” nel Palaciu de Valdecarzana

Hasta’l próximu 17 de marzu, la fotógrafa Maribel Xixón espón “De puertes adientro” nel Palaciu de Valdecarzana d’Avilés. Tratase d’una serie de fotografíes que configuren un percorríu al traviés de los sentimientos más íntimos del ser humanu. 

El Palaciu de Valdecarzana acueye dende’l vienres, 24 de febreru, y hasta el 17 de marzu, la esposición “De puertes adientro”, obra de la fotógrafa asturiana Maribel Xixón. Tratase d’una serie de 21 fotografíes de corte intimista qu’enceten los sentimientos más reservaos del ser humanu, y que de cutiu tienen que ver con situaciones estremes no emocional.

Según la mesma autora, “De puertes adientro” surde de la necesidá de “glayar” lo que mientres un llargu periodu de tiempu sintiera al so alredor. “Realmente ye una especie de catarsis que desaguó nuna serie d’intres atrapaos gracies a la cámara. Un trabayu fotográficu intimista que cunta, al traviés d’imaxes, esa parte del nuesu mundu desconocida pa los demás”, afirma Maribel Xixón.

Maribel Xixón empezó yá mientres la so infancia a sentir atracción pola fotografía. Empezó la so formación na década de los 80, asistiendo a los primeros talleres de fotografía analóxica y reveláu en llaboratoriu al traviés de de formación ensin reglar. Dende 2011 intensifica les sos conocencies en materia de fotografía y procesáu dixital, al traviés tantu del estudio autodidacta, esperimentando nueves técniques, como asistiendo a cursos y talleres de distintes disciplines fotográfiques.