La Ventana de la Factoría sigue’l so segundu ciclu de videoarte n’Avilés

La Ventana de la Factoría sigue’l so segundu ciclu de videoarte cola proyección de “Passage of sound” que puede vese hasta’l 6 de febreru en reproducción continua de 18.30 a 00.30 hores. Tratase d’un curtiumetraxe nel que la so autora, la irlandesa Shelagh Honan, que participó en 2018 nuna estancia del proyectu européu Womrts n’Avilés, esquiza un mundu d’escosamientu y alienación

La Factoría Cultural punxo en marcha’l segundu ciclu de “La Ventana de la Factoría”, que proyecta ‘una de les cristaleres de la fachada del centru que da a l’avenida de Portugal distintes creaciones de videoarte. A partir de la tarde del xueves 17 de xineru, ya pue vese la segunda propuesta del ciclu, el curtiumetraxe “Passage of sound”, una obra de l’artista visual irlandesa Shelagh Honan. Les proyecciones tienen llugar de forma siguida, de 18.30 a 00.30 hores, hasta’l miércoles 6 de febreru.

Esti segundu ciclu de “La Ventana de la Factoría”, que sol títulu “Paisaxes del Antropoceno” espón dende una mirada crítica l’impactu del ser humanu nel medio ambiente dende la so apaición nel planeta, empezó cola proyección de “Lluces de Yerba”, del uvieín Juan Falcón.

La obra de Shelagh Honan, d’unos 22 minutos de duración, presenta un mundu d’escosamientu, aislamientu y alienación. Y configurase como un viaxe metafóricu en busca de la inspiración, con una intencionalidad lenta, d’introspeición poética, con tomes llargues, al traviés de paisaxes irlandeses, nos que conecta al espectador cola so propia memoria. L’autora ye profesora na Escuela d’Arte y Diseñu de Limerick, n’Irlanda. El so trabayu céntrase principalmente nel vídeu, la fotografía y les instalaciones, en continua busca de nueves estratexes narratives, nes qu’adquieren especial relevancia’l soníu y l’imaxe na creación de redolaes interactivos.

El pasáu mes de setiembre de 2018, Shelagh Honan participó nuna estancia n’Avilés, nel marcu del proyectu européu Womrts, financiáu pol programa Europa Creativa de la Unión Europea, que busca la puesta en valor y el fomentu de la creatividá de les muyeres y nel que participa la conceyalía de Cultura d’Avilés al traviés de la Fundación Municipal de Cultura y la Factoría Cultural.

Próximes proyecciones

El curtiu “Passage of sound” toma’l relevu nel segundu ciclu de “La Ventana de la Factoría” de la obra “Lluces de Yerba”, de Juan Falcón. Tres d’ella, van asomar a la fachada de la Factoría Cultural Paco Naide (del 7 de febreru al 4 de marzu), Alba G. Corrolada (del 5 de marzu al 2 d’abril) y Ana Esteve Reig ( del 3 al 30 d’abril). El ciclu, que lleva’l títulu de “Paisaxes del Antropoceno”, ta comisariado pola ceadora asturiana María Castellanos.