Indalecio Prieto vuelve a la so ciudá de nacencia con una esposición

“Indalecio Prieto vuelve con esta esposición a Uviéu, la so ciudá de nacencia, a esti espaciu que percorrió na so infancia –una placa na cai Madalena recuerdalu anguaño-“. Con estes palabres l’alcalde, Wenceslao López, empezaba la so intervención nel actu inaugural de l’amuesa “Indalecio Prieto. La razón en marcha”, que va poder visitase na plaza de Trascorrales hasta’l 24 de xunetu.

El primer conceyal cavilgaba nesti actu de presentación sobre la importancia del diputáu y ministru socialista, periodista y home d’Estáu utilizando un mensaxe certeru que’l mesmu Don Inda pronunció en 1936 y que nun tien fecha de caducidá”. Entós, Prieto, aseguró que “La Educación y la Cultura son el meyor pasaporte escontra una sociedá más xusta”.

L’amuesa sobre la figura política asturiana, según l’Alcalde, “traza la semblanza d’una gran figura histórica, avéranos a un  home poliédricu: socialista, políticu, pensador, periodista…“. Col deséu de qu’esta amuesa “sirva tolos ciudadanos y ciudadanes que la visiten p’afinar el so sentíu críticu”, López convidó a visitala pa conocer en fondura “a esti gran home d’Estáu que siempres se consideró uvieín y asturianu, vascu d’adopción y mexicanu mientres el so esiliu”.

Tamién intervieno nel actu inaugural el Conseyeru d’Educación y Cultura del Principáu, Genaro Alonso Mejido, pa quien esta amuesa “ye muncho más qu’una esposición, ye una parte de la memoria colectiva que va ayudar a sostener la nuesa memoria social”.

Nel actu, una de les comisaries de l’amuesa, Concepción Pared Díaz-Naves, Directora del Arquivu Históricu d’Asturies, estimó enforma’l trabayu de la Fundación Municipal de Cultura, col conceyal de l’área, Roberto Sánchez Ramos al frente; de la Fundación Indalecio Prieto, del Muséu del Exércitu, Arquivu Históricu… no que calificó de “un esfuerzu dilatáu nel tiempu”. Al actu asistieron, ente otros, Nicolás Redondo Urbieta, hestóricu sindicalista y políticu español; l’ex alcalde d’Uviéu, Antonio Masip y conceyales del actual equipu de gobiernu: Ana Rivas, Diego Valiño, Ricardo Fernández, Marisa Ponga, Iván Álvarez, Cristina Pontón o Isabel Bermeyu.