Andrés Pascual gana’l premiu Novela Histórica Alfonso X El Sabiu

L’escritor logroñés Andrés Pascual, cola so novela Taj, alzóse esta selmana col Premiu de Novela Histórica Alfonso X El Sabiu na so decimoquinta edición.

El galardón convocalu la editorial Espasa en collaboración cola Fundación Caja Castilla La Mancha y ta dotáu con 30.000 euros. El xuráu, que decidió’l fallu por mayoría, declaró que “col telón de fondu de la construcción del Taj Mahal, Andrés Pascual constrúi una novela redonda, d’amor y superación, que dexa al llector bien satisfechu.”

La escritora y académica Soledá Puértolas presidió’l xuráu, qu’integraben amás Almudena de Arteaga, Javier Moru, Javier Negrete y Ana Rosa Semprún. L’autor, que se manifestó “emocionáu” en conociendo’l fallu, quixo “dar les gracies a los miembros del xuráu por escoyer esti puñáu de páxines ente tantes noveles presentaes, dándome la oportunidá de compartir plantel con autores ganadores d’ediciones anteriores a los qu’almiro”.

En Taj, Pascual cuenta cómo xusto primero que la bella emperatriz del Indostán Mumtaz Mahal cerrara los güeyos pa siempres, el so maríu prometió-y honrar la so alcordanza col monumentu más formosu enxamás construyíu. Por eso Taj ye la hestoria d’esa construcción y de los sos venti mil héroes: arquiteutos, calígrafos, maestros artesanos y obreros que, engaramaos al llombu de los elefantes, abasnaben los enormes bloques de mármol.

Una narración épica vista al traviés de los güeyos de Balu, un rapazu del desiertu con unes dotes estraordinaries pal dibuxu que se va enfrentar a tolos convencionalismos pa recuperar a la so amada Aisha, recluyida nel harén del soberanu.

Pascual (Logroño, 1969) exerció mientres veinte años como abogáu, pero anguaño vive a caballu ente Londres y España y dedícase a la escritura y a impartir charres sobre motivación. El rioxanu ye autor d’otres noveles traducíes a dellos idiomes como El guardián de la flor de lotu o El haiku de les palabres perdíes.