Frida Kahlo protagonizó la primera actividá de “Un branu con muncho arte”

La propuesta “Un branu con muncho arte n’Avilés”, qu’algama la so tercer edición llevando l’actividá cultural a les cais de la ciudá, arrincó’l sábadu 18 d’agostu cola primera de les  cites programaes. La figura de la pintora Frida Kahlo foi la protagonista d’una actividá que se desenvolvió a les 20 hores en Palacio Valdés.

“Trés cantares, dos cuadros y un diariu: Frida Kahlo” ye’l títulu d’esta propuesta gratuita y para tolos públicos centrada n’una de les figures artístiques más importantes del sieglu XX. A partir de detalles de dos obres de Kahlo -un autorretratu y la que foi la so última composición- l’artista avilesina Itziar Sánchez va encetar un gran llenzu en blancu.

Coles mesmes, la historiadora del arte Patricia Pérez glosó la vida y l’obra de Kahlo menantu sonaben temes musicales rellacionaos cola pintora, interpretaos en directu pola cantante local Emma Black y pol artista mexicanu Frank Navarro, que va faer sonar una de los cantares preferíos pol so compatriota.

El programa de la tercer edición de “Un branu con muncho arte” completase con otres dos actividaes a desenvolver los díes 25 y 31 d’agostu, centraes na conocencia sobro Avilés na Edá Media y na invisibilización de la muyer na Hestoria del Arte, respectivamente.

L’oxetivu de “Un branu con muncho arte”, que surde de la collaboración ente la conceyalía de Promoción de Ciudá y l’entidá cultural avilesina “Cúntame un cuadru”, ye convertir la cultura nuna ferramienta de diversión, d’educación y de conocencia, d’una forma ameno y cercano, accesible a tolos públicos, tanto locales como visitantes, y siempres de forma gratuita. Nel conxuntu de les dos primeres ediciones superáronse los mil participantes.

Calendariu d’actividaes “Un branu con muncho arte n’Avilés”

Sábadu 25 d’agostu, 12 hores. “Avilés medieval en familia”. Plaza d’España.
Vienres 31 d’agostu, 19.30 hores. Femenín plural: Grandes Maestres de la Hestoria”. Palaciu de Valdecarzana.