El Muséu d’Avilés acueye la esposición “La Marcha de Fierro. Ochobre, 1992”

Esti 15 de payares inaugutose nel Muséu de la Hestoria Urbana d’Avilés la esposición “La Marcha de Fierro. Ochobre, 1992”. L’actu tuvo presidíu pola alcaldesa d’Avilés, Mariví Monteserín y la conceyala de Cultura, Yolanda Alonso, xunta’l director de la Fundación Juan Muñiz Zapico, Benjamín Gutiérrez Güerta.

La esposición va esibise nes sales d’esposiciones temporales del muséu avilesín hasta’l 10 d’avientu. Ta compuesta por una escoyeta de fotografíes realizaes por Ángel Fernández Alderete y Viciente Juidia, dos de los protagonistes de la marcha que va venticinco años partió d’Uviéu camín de Madrid. Siderúrxicos asturianos y vascos, entós de Ensidesa y Altos Fornos de Vizcaya, trataben con esti actu de defender la continuidá de la industria siderúrxico.

Les fotografíes van tar acompañaes d’un vídeu con imaxes de la marcha y tamién con otros elementos como llibros o les pegatinas que s’ellaboraron pala ocasión. Como interés, l’Área de Cultura, tamién apurre de los sos fondos la documentación orixinal, que sirvió pa unos meses dempués, n’abril de 1993, designar a una de les cais de nueva construcción como “Cai de la Marcha de Fierro”. Como reza lliteralmente’l testu del alcuerdu municipal, esta decisión tomase al “constituyir esti acontecimientu’l primer finxu na hestoria local na que s’apiguren nel so sofitu tolos estamentos locales, ensin distinción d’ideoloxía, para defender les bases de la nuesa economía”.

La Marcha de Fierro constituyó un finxu nes reivindicaciones llaborales españoles. Los procesos de reconversión siguieron, pero la cabecera siderúrxica asturiana caltúvose. Aquella acción del pasáu nun dexa de ser un elementu fundamental na pervivencia del presente y na esperanza del futuru con nueves inversiones que xeneren empléu y texíu económico n’una contorna para la que la industria siderúrxico tuvo un papel fundamental nel postreru mediu sieglu.