Dispararte abrió les sos puertes en Xixón coles propuestes estétiques de 62 artistes mozos

L’Amuesa d’Artes Plástiques d’Asturies, Dispararte, inauguróse ayer en Xixón con presencia de la directora xeneral de Mocedá, Carmen Becerra, la conceyal del Cultura del conceyu agospiador, Mercedes Álvarez, y el comisariu de la esposición, Francico Cabrifosse. La colectiva espón 62 trabayos d’artistes mozos nun conxuntu xeneral nel que predominen la pintura y la fotografía, asina como la diversidá de tendencies y propuestes estétiques de los sos autores.

Nomes como los de Lorena Álvarez, Irma Álvarez-Laviada, Cristina Busto, Juan Díaz-Faes, Jorge Faes, José Jorge Nava, Jacobo de la Peña, Elena Rato, Fermín Santos, Eduardo Guerra, Isabel Fernández y Eva María Pividal, son dellos de los qu’enseñen el so llabor nesta Amuesa, que en palabres del so comisariu Crabifosse “ye una guía de per ónde va l’arte asturianu actual y per ónde va dir nos prósimos años”.