Ai Weiwei esplega cientos de chalecos salvavides en Berlín

Cientos de los chalecos salvavides naranxes usaos polos refuxaos p’algamar les mariñes europees cubren güei les columnes del Konzerthaus de Berlín, como parte d’una instalación del artista y activista chinu Ai Weiwei n’alcordanza a millones de persones que fuxen de la guerra.

La obra, na céntrica plaza de Gendarmenmarkt, recibió esti llunes a los invitaos a la gala de Cinema for Peace (Cine pola paz), iniciativa que, coincidiendo cola Berlinale, va apurrir un añu más los sos premios a una selección de películes de conteníu social, críticu o humanitariu.

L’actriz Charlize Theron foi la encargada d’apurrir el galardón principal a la película escoyida pol xuráu, que nesta edición tuvo a Ai como presidente d’honor. L’artista atópase atolláu nun nuevu proyectu centráu nos refuxaos na isla griega de Lesbos y tuvo presente na gala del llunes al traviés de la so instalación, na qu’incluyó un bote salvavides al pie de los chalecos.

El destín de quien se ven obligaos a abandonar el so llar convirtióse nos últimos meses nuna constante nel trabayu de Ai, qu’a principios de mes cubrió en Praga la so obra Cabeces del Zodiacu con cobertores térmicos doraes pa protestar pol sufrimientu de los refuxaos nel so camín a Europa. En xineru decidió cerrar una esposición en Copenhague y retirar una obra so del muséu d’Aros, nel oeste de Dinamarca, en protesta poles nuevu lleis d’asilu daneses.

Les autoridaes chines devolvieron el pasáu xunetu’l so pasaporte al artista, autorizadolo a salir del país per primer vegada en cuatro años. Dende entós Ai, conocíu poles sos crítiques al réxime comunista chinu, ye un habitual de Berlín, onde exerz como profesor convidáu de la Universidá de les Artes (UdK).