Abierta la inscripción nel Conservatoriu d’Avilés

El Conservatoriu Municipal Profesional Julián Orbón abrió’l plazu d’inscripción para les pruebes d’accesu a les 17 especialidaes d’Enseñances Profesionales del próximu cursu, 2021-2022. La principal novedá va ser la esperada especialidá de Cantar, un impulsu a los estudios impartíos dende’l mesmu centru, al dar la oportunidá de tomar nuevos repertorios.

Cantar sumase al restu d’especialidaes instrumentales que yá ufiertaba’l conservatoriu, y qu’abrieron coles mesmes el períodu pa inscribise: Saxofón, Flauta trevesera, Fagó, Clarinete, Oboe, Trompa, Trompeta, Trombón, Tuba, Percusión, Pianu, Órganu, Violín, Viola, Violonchelu y Contrabaxu.

La tramitación de la especialidá de Cantar, impulsada pol anterior equipu directivu del Conservatorio, empecipióse va trés años. Yá remataron los trámites alministrativos necesarios y peracábase la creación d’una bolsa de trabayu de docentes de la especialidá.

Estes enseñances dexen al centru avilesín dar un saltu na so propuesta formativa, cuidando que va brindar al alumnáu del centru la oportunidá d’averase a nuevos repertorios, tantu nes agrupaciones de música de cámara y nes grandes agrupaciones, como nes orquestes de cuerda, vientu y l’orquesta sinfónica, pudiendo incluyir música dende zarzuela a ópera o oratorios.

Pa superar les pruebes d’accesu a Cantar, al igual que’l restu de los instrumentistes, los y les aspirantes tendrán de realizar un exame de llinguaxe musical, y amás, interpretar dos cantares, una d’elles de cantar llírico. Nun ye necesariu cursar enseñances elementales, cuidao que la peculiaridá de les enseñances de Cantar ye que s’empecipien na etapa profesional.

Los estudios tienen una duración de 6 años, y nellos imparten asignatures como pianu complementariu, idiomes, hestoria de la música, música de cámara, coru, harmonía, analís o fundamentos de composición, amás de delles asignatures optatives.

El plazu d’inscripción, tantu en Cantar como nel restu d’especialidaes, va permanecer abiertu hasta’l 11 de mayu. Y podrá realizase na secretaría del conservatorio los llunes, martes, miércoles y vienres n’horariu de 11.00 a 13.00 hores, y los xueves, de 17.00 a 19.00 hores.

Tola información sobro les pruebes atópase recoyida na páxina web del propiu centru, http://conservatoriojulianorbon.com/.