Algaire repite l’éxitu del 2022 en Lorient

Algaire remató la so participación nel 52 Festival Interceltique de Lorient na nueche del miércoles nel escenariu de la Place des Payses Celtes, con un conciertu que pesllaba la xornada y que repetía l’exitu del que ya ufrieron la nueche anterior nel escenariu más mozu del Festival. El grupu Algaire yá amosó una conexón significativa col públicu más *jóven na so primer actuación la nueche del martes en Le Kleub onde se vió l’alcordanza del so pasu y la so vitoria nel Troféu Loic Raison de la pasada edición coincidiendo col añu d’Asturies.

Los trés pandereteres asturianes supieron dar al públicu lorientés el ritmu incipiente que los tradicionales “lerelereles” del so sentir popular y el so saber tar nel escenariu fixéron-yos ganar en 2022 l’apreciáu troféu pa los grupos nuevos qu’ufierta’l Ferstival.

Loreto Suarez, Iratxe Espina, Carla Miranda y Juan Yagüe, que formen Algaire, tuvieron la inestimable collaboración de les bretones de “Ahez” y de  Juanjo Diaz y Juan Carlos Vega con una instrumentación que se vió arredondiada pol acompañamientu a la danza de Luis Ángel Fernández y Ainara Pola, qu’acompañen davezu al grupu y que repitieron al otru día na nueva Plaza de los Países Celtes, onde supieron rindir tamién al públicu na nueche del miércoles.