La Delegación asturiana en Lorient protagoniza la xornada mediática nel FIL

La Delegación asturiana en Lorient protagonizaba esti martes la xornada mediática nel 52 Festival Interceltique de Lorient con un reportaxe sobre la presencia de los baillarines y músicos de les delegaciones que participen nel Festival nos albergues de la villa bretona que s’exemplificaba col casu de los asturianos, xustamente nel día qu’aportaben a la programación José Manuel Tejedor y Algaire, que van actuar a lo llargo la selmana.

El periódicu Le Télégramme espublizaba esti martes na so seición deedicada a Lorient un perguapu reportaxe que tenía a la delegación asturiana como protagonista, de cabezalera de les delegaciones que se reparten polos albergues y agospiamientos colexales de la villa lorientesse. Nel casu de los asturianos, esti añu, alcuéntrense agospiaos nel Lycée Notre-Dame de la Paix en Ploemeur, a cuatro kilómetros del centru la villa, que tienen de facer munches vegaes a pié si quieren torna a dormir a altes hores de la nueche, cuando ya nun funciona’l tresporte públicu. Magar se desplacen nos buses de la Delegación que los traxeran dende Asturies, los más correnderos tienen que caleyar más de media hora hasta’l Notre Dame pela nueche, no que ye un clásicu de la delegación asturiana, que dacuando agospiase nesi institutu de la Comunidá de Lorient.

Esti martes, la foto qu’acompaña estes llínies abría’l mentáu reportaxe y la información sobre el Festival nel diariu Le Télégramme y facía protagonista a la delegación asturiana como preámbulu de les actuacioneds que diben dar a lo llargo de la tarde y la nueche José Manuel tejedor y el grupu Algaire na nueva Plaza de los Países Celtes.