Entamó en Lorient el 52 Festival Interceltique

Esti vienres 4 d’agostu entamaba’l Festival Intercélticu de Lorient que celebra’l so 52ª edición que se va a enllargar hasta’l 13 d’agostu y que tien a Irlanda como convidada d’honor esti branu.

Los nomes anunciaos dende’l principiu para’l Festival d’anguaño, como Clannad, Suzanne Vega, Barzaz, I Muvrini, Mànran, HF Thiéfaine, Altan & l’Orchestre National de Bretagne, Talisk, Denez Prigent, Usher’s Island, Only Boys Aloud, Cúig, o Niteworks… el Festival inclúi tamién grupos como  The Kilkennys (Irlanda), Startijenn (Bretaña), Ross Ainslie & Ali Hutton Trio (Escocia), Horizons Celtiques, Mec Lir (Isla de Man), Kelf (Bretaña) y espectáculos como “Intercelt’Danses”, de dances contemporaneas con Qwerin (Gales) et Stagañ; Korriged is (Douarnenez) (Bretaña), Kinnaris Quintet (Escocia), Algaire (Asturies), Dièse3 et Annie Ebrel (Bretaña), Vindotalé (Bretaña), Xascaríz (Galicia), la Grande soirée de l’Irlande avec Téada et Danú, The Friel Sisters (Irlanda), The Trials of Cato (Gales), José Manuel Tejedor (Asturies) y finalmente, la incorporación d’última hora del dúo asturianu L-R que va actuar na última xornada del Festival.

Les novedaes de 2023, pasen pola vuelta del llamáu distintivu de sofitu, vendíu al preciu de 7 euros y gratuitu pa menores de 12 años, que dexa amosar públicamente’l sofitu a la FIL y aportar a numberosos conciertos y eventos mientres los 10 díes y 10 nueches: los conciertos del Kleub, los conciertos del Quai de la Bretagne, los talleres de la Sal-y Carnot, el festoù-noz de la Sal-y Carnot, les masterclasses del Palais des Congrès y les proyecciones de CinéFIL.

L’antiguu Espace Marine, rebautizado el pasáu añu como ‘Espace Jean-Pierre Pichard’ ye l’escenariu principal del Festival, y vuelve ser una carpa cubierta asitiada na Plaza d’Armes de Lorient. Dedicáu pela nueche a los grandes nomes del festival, como’l de Suzane Vega esti sábadu, el llugar tamién ufierta pela tarde espectáculos de música y danza de les naciones celtes, como’l Grupu asturianu de Baille Fitoria que va abrir tamién esti sábadu’l y qu’al pie de la Banda de Gaites de Castrillón, que tamién actúa esta tarde poles cais de Lorient, componen la delegación asturiana.

Amás, Lorient estrena la nueva place des Pays Celtes onde un pergrande escenariu va acoyer actuaciones de tolos paises participantes animando les casetes de cada país qu’agora allúguense alrodiu d’esta plaza y comparten escenariu. Asina, en llugar de repartir por mini escenarios a los grupos de cada país, segmentando l’audiencia, concéntrase nel centru la plaza, no que algama ser meyor pal mercáu de productos tradicionales de los países participantes.