Tatxers, Skabidean y la nueva escena musical Navarra aporten a Uviéu

Dos de los grupos más destacaos de la nueva escena musical Navarra, Tatxers y Skabidean, actúen n’Uviéu Llata de Cinc, sala qu’acueye’l 30 de setiembre l’eventu Iruña-Asturies Clash onde toquen estos grupos punk y ska y tamién hai pinchada reggae.

Iruña lleva siendo dende hai más de 40 años el trubiecu de dalgunos de los grupos más relevantes a nivel estatal de distintos estilos musicales. Y pa conocer más a les nueves bandes que tán surdiendo na capital navarra, el sábadu 30 de setiembre va celebrase na sala Llata de Cinc d’Uviéu l’eventu Iruña-Asturies Clash, un alcuentru a ritmu de punk, rock, ska y reggae ente los visitantes Tatxers y Skabidean y los DJs locales de música jamaicana Miguinah Selektah y Raúl Economatu.

Tatxers ye un nuevu tríu formáu en 2018 y ta siendo unu de los grupos revelación de la escena punk euskaldun. Recuerden a los primeres Hertzainak, a Kortatu, al punk-rock británicu del ‘77 y amás tienen unes ramalaes pop que los convierte nuna banda llena de personalidá. Dempués de la publicación del so esitosu primer EP Hiruzpalau amets larri, va pocos meses publicaron el discu de llarga duración Tatxers.

Skabidean ye una banda que tien a los sos llombos más de 10 años de trayectoria y 300 conciertos. Con 11 persones sobro l’escenariu, trés voces y xuna sección de metales al completu, formen xuna auténtica orquesta que fai que’l públicu baille al son del puru ska, rocksteady y reggae. Izaera ye ún de los sos discos más destacaos, que preciede a Hiri Zahar Zikina, el so últimu trabayu.

El conciertu va empezar a les 21 hores y tien un preciu de 12 € la entrada antemanada -a traviés d’Entradium.com- y de 15 € na puerta. Pero antes y pa da-y más color al eventu, los DJs de la Cuenca’l Nalón Miguinah Selektah y Raúl Economatu van tar pinchando música jamaicana n’estrictu vinilu dende les 18.30h y con entrada llibre. L’eventu ta entamáu pola promotora de música en llingües minorizadas Ixuxú Cultura, el programa de radiu Ximiélgalo Radio Show y la tienda L’Economatu Discos.