Fitoria torna nueve años depués a brillar en Lorient.

El Grupu de Baille Tradicional de Fitoria amosó esti s’abadu primeru d’agostu una perguapa actuación nel 52 Festival intercélticu de Lorient, al que tornaba nueve años depués con una escoyeta de dances y bailles tradicionales que dafechamente encadarmada ensin dar nin un respiru dexó más que satisfechu al desixente públicu de la villa bretona.

El Pericote con solo seis aldeanes, perbien desenvueltos y pieces más populares de baille tradicional, ufrieron un espectáculu que finó con una aplaudida danza prima que fizo desbordar l’interés del públicu na que yera la primer xornada del Espace Jean-Pierre Pichard que tornaba otra vuelta esti añu al so formatu de davezu como carpa zarrada nel llugar del anfiteatru abiertu que foi l’añu pasáu.

Anguañu, el grupu ta formáu por más de 20 persones ente gaiteros, tamboriteros, pandereteres y pareyes de baille, con instrumentos como la gaita, el tambor, la pandereta, el panderu o les castañueles de siempres acompañes por un grupu musical qu’engarza los teclaos y les cuerdes con enfotu y resultaos granibles.

El Grupu de Baille Tradicional de Fitoria (GBTF) fundóse en 1989 col nome d’Asociación San Antonio de Fitoria, baxo la direición de Joaquín Ruiz Prado. Nel so entamu, el grupu foi creáu pa participar nes fiestes patronales del pueblu,  que se facíen n’honor a San Antonio. Y nos primeros años de vida del grupu la influencia de Coros y Danzas de la Sección Femenina tanto nos bailles como na indumentaria foi patente nel GBTF. Pasín a pasu, esa distorsión de la tradición asturiana, alitada pol afán d’uniformidá de les décades anteriores, foi quedando atrás gracies al interés creciente del grupu na investigación del folclore asturianu. Esto foi dando llugar a la recopilación de pieces y bailles tradicionales recoyíos per tola xeografía  d’Asturies y que pasaron a formar parte del repertoriu del grupu.

El Grupu de Baille Tradicional de Fitoria pon especial procuru na tresmisión de los bien de cantares, bailles y dances de les diferentes fasteres d’Asturies, cuidando de ser fiel al so orixe y dando amuesa de la gran bayura cultural asturiana.

La indumentaria utilizada nel GBTF correspuende al traxe tradicional asturianu utilizáu dende finales del sieglu XVIII hasta la metá del sieglu XIX. Si bien anguañu esta indumentaria tal cual nun ye usada davezu n’Asturies nos llabores diarios, sí representa la última forma autóctona de vestimenta del pueblu asturianu enantes del espoxigue de les nueves modes que llegaron a Asturies cola meyora de les comunicaciones a partir de 1850.