El colexu Xovellanos de Xixón empecipia la so Selmana Cultural Asturiana

Con pastelinos d’hoxaldre, mazana y miel abríen la selmana  qu’entamó ayeri  bona parte de los alumnos del colexu Xovellanos, qu’hasta’l llunes que vien van participar nun intensu programa d’actividaes centráu na cultura tradicional.

Charres, talleres y esposiciones dan forma a la sesta edición de la Selmana de Cultura Asturiana nesti centru educativu na que la naturaleza y la tradición van tomar protagonismu. Una iniciativa que cunta cola collaboración del Muséu Marítimu de Lluanco, la Banda de Gaites Villa de Xixón, el Fondu Asturianu pa la Protección de los Animales Selvaxes (Fapas), la escuela tradicional Quintana y l’escritor Julio Rodríguez, quien va participar nun alcuentru colos alumnos de sestu, mañana, nel salón d’actos.

Coles mesmes, esta selmana cultural va cuntar con dos esposiciónes, una sobre’l ‘gomeru’, ufiertada pola peña xixonesa del mesmu nome, y otru sobre les abeyes, al cargu de la Asociación d’Apicultura. El xueves va tener llugar el ‘magüestu’ de la AMPA y el vienres, los alumnos van baillar la Danza prima’ nel patiu.