La UABRA aporta a la segunda selmana d’actividaes

Depués de los actos inaugurales de la Universidá Asturiana de Branu (UABRA) n’El Campu (Casu) y A Caridá (El Franco), esta selmana desenvolviéronse yá los primeros cuatro cursos de los que componen la programación de dos selmanes de la UABRA.

Nel escenariu casín, onde se celebren tres d’ellos, abrieron la UABRA Pilar García Cuetos (Vicerrectora d’Estensión Universitaria y Proyeición Cultural de la Universidá d’Uviéu), Miguel Ángel Fernández (alcalde de Casu), Inaciu Galán (secretariu de la UABRA) y Cristina Valdés (direutora de la UABRA). Pel so llau, n’A Caridá, les encargaes de saludar l’empiezu del cursu foron Cecilia Pérez (alcaldesa d’El Franco) y Carmen Muñiz (representante de la Secretaría Llingüística del Navia-Eo).

Esi mesmu día pela tarde, a les siete y cuartu, Vicente Espina, direutor del Parque Natural de Redes,  empecipió les actividaes abiertes al públicu de la UABRA, ufriendo una conferencia sobre’l paisax cultural y natural de Redes nel propiu centru d’interpretación del Parque.

Al día siguiente, dende les diez y cuartu de la nueche, la Banda Gaites Lakadarma dio un conciertu en movimientu peles cais d’El Campu. Zarrando la selmana, el xueves a les siete y cuartu, tamién nel centru d’interpretación del Parque de Redes, el caderalgu de ciencia política y académicu Francisco Llera presentó los resultaos del estudiu sociollingüísticu más recién nes zones urbanes d’Asturies: “La urbanización del asturianu”.

N’As Quintas d’A Caridá, pel so llau,esti miércoles dende les seis de la tarde,  celebrose la presentación de la coleición Bidureira, cola participación de los sos tres primeros autores: Ricardo Saavedra, cola obra “El xogo sin fin”; Sergio Buelga, con “Ondina Llago”; y Carmen Siñeriz, con “Pigureira de palabras esqueicidas”. Estos tres títulos, de narrativa, teatru y poesía, abren el camín d’una coleición fecha pa recoyer la creación lliteraria contemporánea n’eonaviegu.