L’actor Carlos Alba vien dedicando los últimos años a l’anovación del monólogu asturianu, una de les señes d’identidá de les artes escéniques asturianes. Dientro d’esi proyectu entama cada añu en Candás, un cursu de monologuismu nel que forma a los actores del futuru. Pa conocer más sobre los conteníos del cursu, la visión del monologuismu d’anguaño y los proyectos del intérprete de personaxes como Cellero o El Pola, falamos con Carlos Alba na Entrevista de la selmana.

La páxina web “Pola xuntanza”, que nel añu últimu vien siendo llugar d’alcuentru ente los partidarios de la xuntanza de los partíos nacionalistes asturianos, anuncia güei la creación d’un colectivu de ciudadanos que “vien aconceyando con regularidá col envís d’analizar la situación del movimientu políticu nacionalista/asturianista nes sos estreames sensibilidaes”. La iniciativa entama agora un procesu de regulación formal pente medies de la creación d’una asociación, de nome “Coleutivu Pola Xuntanza”.

Les “Nueches na Plaza Mayor” de Xixón recibe güei, xueves 29, a partir de les diez de la nueche, la música de Martha Reeves, considerada diva del Soul desque blancos y negros empezaben a baillar xuntos na América convulsa de mediaos de los 60 y alma del sellu Motown. Reeves trabayó y cantó en directu con James Brown o Bruce Springsteen y sigue editando y produciendo discos güei, en dexando les sos obligaciones polítiques na so Detroit natal.

Güei, miércoles 28 de xunetu, a partir de les diez y media la nuehce, Joaquín Sabina llega a Xixón. El Palaciu los Deportes de La Guía ye’l llugar escoyíu pa romper el silenciu del cantautor n’Asturies. “Vinagre y rosas”, el so discu nuevu, cunta con trece nuevos cantares del emblemáticu personaxe.

El Foru Estatal pola Memoria, la Federación Asturiana Memoria y República y El Subko Producciones acaben de sacar al mercáu un discu colos directos del II Republicastur, conciertu fechu en Mieres, en 2009, como homenaxe a la Revolución d’Asturies, d’ochobre de 1934. Nel discu participen, con cantares en castellán y n’asturianu, los grupos Boikot, Fe de ratas, Skontra, Desakato, Taranuss y Sambre. 18 temes que pueden mercase por seis euros.

El diariu vascu Deia espublizó esti domingu una entrevista col Presidente de Cantabria, el rexonalista Miguel Ángel Revilla, na que declaró, una vegada más el so amor por Asturies. El Presidente cántabru recordó que’l so pueblu “ta na frontera ente Cantabria y Asturies” reconociendo que por ello, “falo’l bable”.

Güei, llunes 26 de xunetu, inaugúrense les Nueches na Plaza Mayor con un cartelu de luxu apináu de conciertos que van dar empiezu cada nueche a les 22:00 hores. Asina, dende'l día 26 y hasta el 5 d'agostu xixoneses y visitantes van poder esfrutar d’Eli “Paperboy” Reed, Martha Wainwright, Martha Reeves, Zenet, el Niño de la Hipoteca, Los Oricios, Nonno, amás de la programación de l'Agrupación Artística Xixonesa y el Festival Folclóricu Internacional.

La cantante de tonada Anabel Santiago va tocar güei, llunes 26 de xunetu, a les ocho la tarde, en Lluanco (Gozón). El conciertu ye de baldre y nél van poder sentise los temes del so discu nuevu, “Agora”, qu’acaba presentase nel Xardín Botánicu de Xixón.

El grupu punk-rock Misiva, que canta n’asturianu y en castellán, ta preparando’l so primer discu, dempués del ésitu de la so maqueta, asoleyada en 2009. Falamos cola voz del grupu Humber Sierra, que mos cuenta dalgunos detalles del so trabayu nuevu, amás de la so visión sobre’l momentu que vive la música asturiana.

Dempués de la fin del Festival Intercélticu d’Avilés, organizáu por Esbardu, va celebrase, a partir d’esti sábadu 24 de xunetu, la segunda edición del intercélticu municipal, conocíu como Beltaine. Conciertos, charres, esposiciones y una montonera d’actividaes que van poder esfrutase nes cais d’Avilés hasta l’1 d’agostu.

Esti sábadu, 24 de xunetu, a partir de les ocho y media la tarde, el Teatru Xovellanos de Xixón, ufre l’espectáculu “Memoria de un esclavo” con cantares instrumentales del Perú, México, Caribe y África, embaxo la dirección d’Eduardo Egüez, unu de los grandes especialistes del laúd y de la guitarra barroca, y alma mater d’Emsemble La Chimera: un grupu de música antigua que basa les sos creaciones nun amiestu de conceptos y músiques de distintes dómines. Asina, con gran naturalidá y una resultancia impresionante, Emsemble La Chimera recurre al tangu, los madrigales, sones, habaneres, les tonaes…

TPA anunció güei l’entamu d’un nuevu programa n’asturianu, “Mirasturies, el pasáu recién”, media hora diaria más de programación na nuesa llingua, con documentales que percurren la hestoria, territoriu, naturaleza, arte y tradiciones del país a lo llargo de cincuenta capítulos. La nueva cita col asturianu ye de llunes a vienres, a les 9:30 hores.

El paséu de la Playa Poniente ye’l llugar escoyíu pa la celebración, ente’l 22 y 25 de xunetu, de la sesta edición de la Fiesta de les Asociaciones, qu’organiza’l Conseyu de Mocedá de Xixón. Poniente torna a convertise en puntu d'alcuentru ente mozos y asociaciones, un espaciu que los organizadores califiquen como “una gran plataforma d'espresión llibre pa tresmitir a la ciudá tolo que queramos”. A lo llargo d'estos cuatro díes va haber torneos deportivos de futbol, balonmano, basket, skate, exhibición de grafitis, charres, talleres infantiles, talleres, etc.