L'alumnáu asturianu salió ayeri pela tarde a la cai en contra del amenorgamientu de los graos de cuatro a tres año y l'ampliación de másteres d'unu a dos y güei volvieron faecolo con una protesta doble , en Xixón, dende la plaza del Institutu, y n'Uviéu, dende la de la Catedral. Con pancartes contra la reforma del ministru Wert, l'alumnáu asturianu calificó d'ésitu la segunda xornada de fuelga convocada pa güei. Según el Sindicatu d'Estudiantes, el paru tuvo un siguimientu del 95% n'ESO y FP, y de un 75% nes facultaes universitaries.
La diputada d'IX na Xunta Xeneral del Principáu Emilia Vázquez va encamentar al Gobiernu autonómicu a qu'exerza “con tou rigor” nel conceyu de Grandas de Salime les competencies qu'en materia de protección del patrimoniu arqueolóxicu atribúye-y l'ordenamientu xurídicu.
Esti martes 24 de febreru celébrase nes sales del Paralamentu Européu un alderique políticu alrodiu de la situación na que s'alcuentren les llingües minoritaries n'Europa, nel que van participar numberosos representantes de minoríes llingüístiques de toa Europa. El casu asturianu nun va formar parte de les conferencies principales, pero Andecha Astur tien encamentao al eurodiputáu de Los Pueblos Deciden, Josu Juaristi, que presente'l casu de la llingua asturiana pa que seya considerada col debíu procuru.
"Manuel Menéndez ya la Asturias occidental mediu sieglu depuéis" ye'l títulu de la xornada d'homenaxe a la obra del filólogu asturianu que va celebrase esti vienres 27 de febreru
dende les 17 hores na Casa de Cultura de Navelgas (Tinéu) xunta la apertura d'una esposición. L'actividá vieno ampobinada por delles asociaciones ya instituciones, ente les que s'alcuentren la Universidá d’Uviéu, al traviés del Seminariu de Filoloxía Asturiana, el Real Instituto de Estudios Asturianos, l'Aula Valdés-Salas, la Fundación Valdés-Salas y la Fundación Aula de las Metáforas.
El Gobiernu español afirma que'l yacimientu de Tres la Ilesia en Bañugues - Gozón- ye responsabilidá del "Principado" y del Conceyu Gozón, en rempuesta a les entrugues feches pol Senaor d’Amaiur, Jon Iñarritu, en nome d’Andecha Astur, respeutu a esi yacimientu de Tres la Ilesia. El Gobiernu español retrucó afirmando que s’atopa fuera del dominiu públicu marítimu-terrestre, polo qu’el Ministeriu d’Agricultura, Alimentación y Mediu Ambiente (MAGRAMA) nun lu incluyó ente los daños reparables del temporal de febreru de 2014, nin tien prevista la so inclusión.
Esti sábadu 28 de febreru, l'asociación Iniciativa pol Asturianu va entamar dellos actos d'homenaxe a la lliteratura asturiana n'Uviéu, coincidiendo con dellos aniversarios de les lletres de nuyeso. A les 11 hores nel Cementeriu San Salvador d'Uviéu, va celebrase un Homenaxe al autor clásicu cimeru de les Lletres Asturianes, l'escritor Xuan María Acebal, en cumpliéndose'l 200 aniversariu del so nacimientu. Nesti actu, al qu'Iniciativa convida a tolos amantes de la so lliteratura, lleeránse poemes del autor y diránse unes pallabres alredor de la so figura, xunto al llugar onde descansen los sos restos, no que quier ser un homenaxe a la lliteratura asturiana.
Esti 26 de febreru cumpliranse 200 años del fallecimientu del matemáticu asturianu Agustín Pedrayes y Foyo, nacíu en Llastres el 28 d’agostu de 1744, y el PAS y la so Fundación Nueva Asturies quieren que toa Asturies faiga alcordanza de que Pedrayes ye una de les poques figures internacionales que, nel ámbitu de les ciencies destaquen n'España hasta'l sieglu XX.
Dientro de la so convocatoria Acción: #OFICIALIDÁ con toles lletres qu'entamara'l pasáu mes de xineru, la Xunta pola Defensa de la Llingua Asturiana fai un llamamientu pa una nueva acción reivindicativa esti sábadu 21 de febreru delantre de les instalaciones de la RTPA en Xixón. Coincidiendo col Día Internacional de la Llingua Materna, na XDLA quieren "facer visible’l papel marxinal que da la televisión pública asturiana al asturianu, funcionando como una ferramienta más de sustitución llingüística en cuenta de ser un mecanismu fundamental na tresmisión interxeneracional del idioma".
Ensin convocar a la mesa sectorial de negociación, el ministru Wert anunció pal próximu cursu un nuevu proyectu pa la contratación como becarios de titulaos universitarios como sofitu en Primaria pa los centros con ncesidaes especiales y SUATEA atalanta que ye "un nuevu engañu qu’implica la falta de soluciones xustes y afayadices a l’actual realidá educativa, dao que nin va aplicase en tolos centros nin los criterios de selección espuestos van garantizar la profesionalidá practicada y demostrada pol profesoráu despidíu, sustituyéndolo por becaries y becarios con empléu precariu".
Siguiendo'l vezu que vien afitando dende va años, Andecha Astur va facer so tradicional actu d'homenaxe nel Cementeriu de Pando de magar les 13:00 d'esti sábadu 12 d'ochobre, nun actu col qu’Andecha Astur quier dexar afitao que se "contrapón a la festividá istitucional del “Díi de la Hispanidá” vindicando la soberanía y el socialismu p’Asturies".
El rostru impenetrable va poder vese na páxina web TPA a la Carta hasta'l 24 d'avientu d'esti añu. Con esti llargumetraxe Gonzali Producciones abría camín al doblaxe cinematográficu na televisión autonómica asturiana. Trátase d'un western fechu n'Estaos Xuníos d'América, que dirixera y protagonizara Marlon Brando, al que tamién acompañaba'l conocíu actor Karl Malden. La Televisión del Principáu d'Asturies estrenólu nuna emisión el 27 d'avientu de 2013, faciendo dos reposiciones, el 10 de mayu y el 8 setiembre de 2014, con perbonos datos d'audiencia en tolos casos.
Esti 17 de febreru Rock Estatal Records llanza 'Eternes Promeses', séptimu trabayu de Mala Reputación. Los asturianos tornen con diez temes musicalmente ambiciosos y llenos d'emotividá. "Que La Tierra..." ye l'adelantu del discu que nun mes va empezar a presentase en directu. Mala Reputación son unu de los nomes más respetaos de la escena rock asturiana y estatal y yá tienen cerraes les diez primeres feches de la xira 2015. La fuerza del so directu va faer escala en sales de tola Península y en festivales como'l Viña Rock.
Izquierda Xunida amuesa'l so “total sofitu” a les movilizaciones y fuelga estudiantil de la próxima selmana nun comunicáu qu'asoleyaba esti día na so web y na que se llantaba contra'l Decretu 3+2’ y la reforma universitaria de wert. Nesi comunicáu Enrique Díez, coordinador de la Área Federal d'Educación, señala que “IX denunció dende antes mesmu de la so aprobación esta norma porque, ente otros motivos, l'accesu a la formación cimera va suponer costos inasumibles pa la gran mayoría de les families ante l'eleváu costu de los másteres, van esaniciase carreres y va despidise profesoráu”.
Héctor Braga hai tiempu enforma que tien un blog y una canal propia en youtube enfotáu nel fechu de "qu'esto ye daqué casi indispensable pa tener cierta visibilidá n'internet", pero esti mes vieno acabante de dar un pasu alantre al remocicar la so presencia audiovisual na rede con delles nueves opciones. Talamente como va cuntando nel so blog, apocayá remocicara esa presencia en You Tube y dende agora cunta nesa rede con delles llistes de reproducción: una coles sos propies interpretaciones en directu y otra dedicada a la banda de gaites que dirixe.
