“Misteriu nel Soterrañu” algama’l premiu Alfonso Iglesias de cómic

La decimoquinta edición del Premiu «Alfonso Iglesias» de Cómic n’asturianu reconoció esti día’l trabayu de Xon de la Campa Valdés (Xixón, 1973) que lleva por títulu “Misteriu nel soterrañu” y que narra les andances del inspector Hevia nel París d’últimos del sieglu XIX, con un estilu averáu a la llínea clara franco-belga.

El xuráu d’esta edición tuvo presidíu pol director xeneral de Política Llingüística, Antón García, y integráu pola filóloga Claudia Elena Menéndez y la llibrera especializada en cómic María Fente, actuando como secretaria Lourdes Álvarez, filóloga de la Dirección Xeneral de Política Llingüística, y destacó «la corrección llingüística y la naturalidá de la llingua escrita que nun suel ser fácil de consiguir nesta modalidá lliteraria» y que sí llogra esta historia.

“Misteriu nel soterrañu” ye un cómic de llínia clara que fai alcordanza de la estética que popularizare Edgar P. Jacobs y que l’autor escribiere hai más de diez años y recuperare pa camudala nel cómic agora premiáu hai dos.

Xon de la Campa Valdés ye ilustrador diplomáu en Grabáu y Técniques d’Estampación pola Escuela d’Arte d’Uviéu. Ente los sos trabayos cúntense ilustraciones y portaes de llibros, cómics y tires en publicaciones periódiques como La Información del Bajo Nalón o La Voz del Trubia. El dibuxante xixonés ilustró y creó les portaes de títulos tan variaos como La Celestina, Drácula, Conan el Bárbaru, El gran llibru de la Mitoloxía asturiana, 1809. Cartes de la revolución de Trubia o Llazarín de Tormes.

El Premiu «Alfonso Iglesias», convocáu pola Conseyería de Cultura, Política Llingüística y Turismu, ta dotáu con 6.000 euros y la publicación de la obra ganadora. Pueden concurrir obres inédites y non premiaes n’otros concursos d’estilu, tratamientu y tema llibre, pudiendo adoptar el desenvolvimientu d’una historia única o un conxuntu d’histories, con una estensión mínima de cincuenta páxines, anque pa participar yera abondo con presentar un proyectu primeru con una estensión mínima de quince páxines.