Portada Conceyos L’IES Real Institutu Xovellanos entama sos primeres Xornaes de Llingua Asturiana

L’IES Real Institutu Xovellanos entama sos primeres Xornaes de Llingua Asturiana

by redacción asturnews
Xornaes del Institutu Xovellanos de Xixón

L’IES Real Institutu Xovellanos de Xixón entama les sos primeres Xornaes de Llingua Asturiana esti miércoles dende les 10 de la mañana y hasta’l vienres, con delles actividaes que van desenvolvese dientru del horariu escolar.

El decanu de los institutos asturianos, fundáu por Gaspar de Xovellanos, entama esta selmana les que van ser les sos primeres Xornaes de Llingua Asturiana, con delles actividaes que van tocar la cuestión llingüística dende distintos puntos de vista. “La idea ye dar una visión amplia de les posibilidaes del idioma, non centrase namás na lliteratura, que tamién va tener el so espaciu, sinón tocar l’usu del asturianu nel ámbitu de la comunicación más actual y l’ociu, por exemplu”, esplica Inaciu Galán, profesor de Llingua Asturiana y Lliteratura del centru, que coordina les actividaes cola collaboración de la profesora Marta Mori.

La conferencia central de les Xornaes va tar al cargu del secretariu de l’Academia de la Llingua Asturiana, Xosé Ramón Iglesias Cueva (Cualloto, 1956), espertu na hestoria de la lliteratura asturiana y l’idioma. Va dar una conferencia enfocada al alumnáu de bachilleratu titulada “L’asturianu nel ámbitu de les llingües d’España”, nel que falara de la idea de plurillingüismu y del valir de la diversidá cultural, dando delles pingarates sobre la hestoria del asturianu y la so situación anguaño.

La segunda charra va dala la ex alumna del centru y comunicadora, Alma Hidalgo (Xixón, 2004), “Ser youtuber y presentadora n’asturianu” va ser un repás pel so llabor como youtuber na plataforma PlayPresta y el so camín pel mundu de la comunicación, con espacios na radio, en programes como Ser Asturies o Desayuno con liantes, na RPA, o’l más recién programa de televisión “Déxate d’histories”, que presenta xunto a Alberto Rodríguez. Alma Hidalgo ye amás activista n’Iniciativa pol Asturianu y una de les escritores más moces de la lliteratura asturiana.

El ramu a les Xornaes de Llingua Asturiana va ponelu la escritora decana de les Lletres Asturianes, Sabel de Fausta (Xixón, 1934). L’autora xixonesa incorporóse nos años ochenta a la lliteratura asturiana y dende entós vien dando a la lluz dellos llibros de poesía y narrativa. Trabe Ediciones asoleyó-y el poemariu Na solombra del silenciu y el volume de cuentos El tren de media nueche y otros cuentos (1996). Amás apaez en delles antoloxíes, como El cuentu asturianu tres la guerra o Muyeres escritores.

Les actividaes van celebrase ente esti miércoles 10 y el vienres 12 de mayu dientro del horariu escolar. El cartelu de les Xornaes recueye al fundador del centru Gaspar Melchor de Xovellanos, que foi defensor del asturianu y dexó escrites cartes nesta llingua, asina como proyectos de gran altor como l’intentu de crear una Academia de la Llingua Asturiana, que cristalizaría finalmente en 1919 y se recuperaría en 1980, o la edición d’un diccionariu y una gramática del idioma. Ta tamién nel cartelu la so hermana Xosefa Xovellanos, primer muyer escritora n’asturianu que se conoz hasta’l momentu. “Quier ser un símbolu del importante venceyu d’esti institutu col asturianu dende la so fundación. Equí l’asignatura lleva munchos años y ta dafechu normalizada na actividá del centru. Amás hai una sensibilidá especial ente’l profesoráu sobre la cuestión lingüística d’Asturies”, esplica Inaciu Galán

Tamién te podria gustar