Bruce Springsteen vuelve al rock col so nuevu single ‘Letter to you’

Tres l’intimista y evocador soníu de Western Stars, llanzáu a mediaos del 2019, el Boss vuelve al rock. Esti xueves pasáu el Boss, Bruce Springsteen, desveló por sorpresa’l llanzamientu’l próximu 23 d’ochobre d’un nuevu discu al pie de la Y-Street Band, cola que nun grababa dende diba seis años (High hopes, en 2014),que va llevar por títulu Letter To You. 

El ventiavu trabayu d’estudiu na carrera de Springsteen inclúi nueve cantares apocayá escrites –temes como One minute you’re here, Burnin’ train, Last man standing, The power of prayer, House of a thousand guitars, Rainmaker, Ghosts ya I’ll see you in my dreams–, según trés composiciones llexendaries pero inédites de los años setenta: Janey needs a shooter, If I was the priest y Song for orphans. Cantares que los sos siguidores yá conocíen dende va décades, gracies a los sos conciertos, pero que nun fueren prindaes nun estudiu hasta güei.

Grabáu nel mesmu estudiu de Springsteen en Nueva Xerséi col so productor y bon amigu Ron Aniello, entemecíu por Bob Clearmountain (The Rolling Stones, Bon Jovi) y masterizado por Bob Ludwig (Led Zeppelin, Queen), Letter to you ye, sorraya la discográfica del cantante, Sony Music, “un álbum de puru y auténticu rock, col míticu soníu orgánicu y directu característicu de la banda de la so vida”. Banda fiel, na que militen la so pareya Patti Scialfa y Nils Lofgren (Crazy Horse), ente otros.

Con cuarenta años de carrera a los sos llombos, Springsteen ganó 20 premios Grammy, un Oscar y un Tony, amás de ser incluyíu nel Salón de la Fama del Rock and Roll, ostenta xuna distinción del Kennedy Center, en 2013 foi nomáu Persona del Añu por MusiCares y en 2016 concedióse-y la Medaya Presidencial pola Llibertá.