El Cine de los Martes torna a Avilés colo meyor del cine independiente

Nel auditoriu de la Casa de Cultura los martes a les 20.15 hores. 11 películes internacionales que transiten por xéneros de la comedia al thriller o’l documental, escoyíes con criterios de calidá, averen a la ciudá títulos que trunfaron en festivales de tol mundu.

Nesti ciclu de setiembre a avientu retómense dalgunos de los llargumetraxes que nun se pudieron ver nel anterior, suspendíu por causa de la pandemia del COVID-19. Les proyecciones, en versión orixinal subtitulada al castellán, caltienen el preciu de 3 euros. Les sesiones van ser numberaes y l’aforu va llindar a 133 butaques ente’l patiu y l’anfiteatru del Auditoriu. Antes de la pandemia, nesti 2020 proxectárense 10 películes, con una asistencia total de 2.625 espectadores

Suspendíu pola mor del confinamientu pola pandemia del COVID-19 nel pasáu mes de marzu, torna’l Cine de los Martes, una de les propuestes culturales más asitiaes n’Avilés. El meyor cine d’autor recupera’l so espaciu nel Auditoriu de la Casa de Cultura, con 11 películes  de 10 nacionalidaes que trunfaron en festivales por tol mundu, dende esti martes 15 de setiembre hasta’l 1 d’avientu.

El públicu d’Avilés va poder esfrutar de películes europees, de Francia, Alemaña, Islandia y Polonia, una mirada al conflictu palestín-israelín con sellu luxemburgués, un documental estadounidense, cinematografía social iberoamericana dende Colombia y Guatemala, y tamién un filme xaponés. El sellu español poner Itziar Bollaín cola so última obra, “La boda de Rosa”, xuna de les grandes trunfadores del recién festival de cine español de Málaga.

Nesti nuevu ciclu retómense dalgunos de los llargumetraxes programaos y anulaos nel ciclu de marzu y abril, ye’l casu de la francesa “Sinónimos”, que va abrir les exhibiciones esti martes, la colombiana “Monos” y la luxemburguesa “Toa pasa en Tel Aviv”. Toles proyecciones, siempres en versión orixinal subtitulada al castellán, van tener llugar nel so horariu habitual de les 20.15 hores.

Más información