Violeta Sánchez Trejo amuesa la so obra n’oléu nuna ‘Amuesa serondiega’

El llunes inagurábase una esposición d’oleos de Violeta Sánchez Trejo na Estación de los ALSAS d’Uviéu. La esposición pue visitase hasta’l día 1 de payares n’horariu de tardes de 18 a 21 hores y sábados y domingos tol día. La muestra, entitulada ‘Amuesa serondiega’, recueye les últimes obres de l’autora pasando por delles fases dividíes en tres series por temática ya estilu diferente.

La propia artista comenta que “una d’elles ye más figurativa, siendo esti figurativismu mui personal, otra serie que tamién pue vese nomase ‘Degradaos’ y otra nomada ‘Presencies’, más concreta faciendo reflexón sobre les solombres y les presencies humanes dende la optica de la filosofía”.

L’artista quier con esta esposición, amás de dase a conocer, comunicar colos espectadores les sos sensaciones a partir de la observación del so entornu y en concretu de la naturaleza y diz que “La serie ‘Presencies’ ye más urbana mientres que les otres dos son más averaes a la natura”. Otru detalle de la obra d’esta artista ye que toles obres tán basaes n’esteriores.

Según comenta Sánchez Trejo “ye interesante esta esposición inda más pol llugar onde ta, una estación d’autobuses onde cientos de persones diaries pasen per ellí, caún cola so hestoria, el so orixen, pero atopandose nel mesmu llugar col mesmu fin, viaxar; igual que l’artista viaxa cola maxinación ya invita a estos viaxantes a que interactúen cola so obra nun exerciciu de comunicación y d’intercambiu d’esperiencies.