Plácido Arango va donar 28 obres de la so colección al Belles Artes d’Asturies

L’empresariu hispanu-mexicanu y expresidente de la Fundación Princesa d’Asturies, Plácido Arango Arias, treslladó esta selmana al presidente del Principáu, Javier Fernández, la so voluntá de realizar la donación d’un conxuntu de 28 obres de la so colección al Muséu de Belles Artes d’Asturies.

Según informó’l Principáu, Arango, fíu d’emigrantes asturianos y expresidente del Patronatu del Muséu del Prau, amosó la so voluntá de realizar una donación d’un conxuntu d’obres de la so colección qu’entiende distintos periodos de la pintura española ente los sieglos XV y XX.

Les mesmes fontes señalaron que los términos nos que se formalizaría la donación, una vegada que fuera aceptada pol patronatu del Muséu de Belles Artes d’Asturies, seríen asemeyaes a los de la realizada a mediaos de 2015 en favor del Muséu del Prau. Les obres concretes que la integren seríen daes a conocer formalmente a la entidá, a la que correspuende aceptar la donación, ensin que, a xuiciu del donante, proceda faeles públiques hasta esi momentu, por respetu institucional.

Arango, fundador del grupu Vips, manifestó’l so deséu de realizar la donación en memoria de los sos padres Jerónimo Arango Díaz y Maria Luisa Arias Fernández, dambos asturianos.