Depués de desfilar peles cais de Lorient y de actuar en Lanester y nel espectáculu de los Horizontes Celtes, la Banda Gaites de Castrillón actuó nel Espace Jean-Pierre Pichard esti segundu xueves d’agostu al mediudía , abriendo la sesión de músiques de los países celtes que cada sobremesa avera al públicu de Lorient al folclore de los paises celtes invitaos al 52 Festival Interceltique.

Media hora de repasu del so repertoriu más recién y un bis enforma solicitáu pol públicu qu’enllenaba prauticamente l’escenariu principal del Festival Interceltique punxeron la guinda a la presencia de la Banda asturiana nesti 52 Festival de Lorient.

Nos sos entamos, el grupu taba formáu por 20 miembros y anguaño cunta con más de 35 músicos, lideraos por Velu Muñiz. La Banda de Gaites de Castrillón participó en munchos eventos n’Asturies y España, pero tamién en Francia, Portugal y Bélxica.

El grupu ye la pilastra fundamental de l’asociación cultural L’Alborecer, creada coles mires de promover la cultura tradicional asturiana na rexón. L’asociación tien la so propia escuela de música tradicional onde se dan clases a los alumnos que depués s’incorporarán a la Banda.

Dende 2004, la Banda entama l’Alcuentru Gaites de Castrillón en Piedrasblancas. Los meyores grupos asturianos danse cita para la ocasión, amás de grupos piqueros de Galicia, Bretaña y Portugal. El repertoriu del grupu componse principalmente de música tradicional asturiana, anque tamién incorpora melodíes d’otros países del arcu atlánticu.