Aína entama’l cursu políticu con un actu n’Uviéu

Aína va entamar esti l cursu políticu con un actu’l 8 setiembre n’Uviéu, onde va  desenvolver un  programa d’actividaes ampliu pa una xornada que quier que seya amás de política festiva.

Baxo’l nome de “8S de soberaníes”, la formación quier convidar a toles sos afiliaes, inscrites y simpatizantes a una xornada de xermandía en La Casona de la Montaña (Uviéu) na que se van amestar intervenciones de calter políticu con actuaciones musicales, charres, entrevistes y una espicha pa les asistentes dende les 12:00h.

L’actu va abrise con una entrevista presentada por Isabel Á. Fernández al escritor, llingüista y académicu David Guardado en rellación cola publicación de la so última obra Nunca vencida. Una historia de la idea d’Asturies.

Coneutando con esi argumentu, Silvia Fernández, Iyán Glez. y Claudia González van reflexonar sobro l’estáu de l’Asturies d’anguaño y les soberaníes a les que tien qu’aspirar el so pueblu nel actu políticu “Atiendi, Asturies, atiendi”. Nél va plantegase tamién un alderique sobro’l significáu que tien el 8 setiembre pa les instituciones y la población asturiano y qué situación se dibuxa nel nuestru panorama políticu pa esta llexislatura.

Amás, va cuntase cola participación d’artistes como la DJ Sandrasian d’Abres o’l músicu Nacho Vegas p’animar una xornada de xermandía na que tamién van ufiertase actividaes pa la reciella tales como cuentacuentos, pintacares y xuegos tradicionales.

Too ello va acompañase d’una espicha a la que les asistentes pueden apuntase hasta’l 6 de setiembre al traviés d’un formulariu nes redes sociales y la web del partíu.