La normalización llingüística afitase dafechu nel Parlamentu

Col saludu de la presidenta del Congresu, Francina Armengol, nes nueves llingües que se puen emplegar nel hemiciclu abriose la xornada que remataba la tramitación del nuevu reglamentu que lleva’l plurillingüísmu del Estáu a la vida parlamentaria.

Con un sonoru “Bon dia, bos dias, egun on, buenos días”, abrió la sesión la presidenta del Congresu, Francina Armengol, a primer hora de la mañana d’esti xueves, nun plenu nel que de nuevu l’alderique parlamentariu espresóse en catalán, euskera, gallegu y castellán. Apenes a media mañana, remató la tramitación exprés de la reforma del reglamentu de la Cámara Baxa, con una mayoría absoluta que, primeramente, refugó les enmiendes rexistraes pol Partíu Popular y l’ultraderecha de Vox, pa responder por la normalización del usu de les llingües cooficiales na see de la soberanía nacional. Armengol pudo facelo tamién n’asturianu y aragonés, al autotraducise emplegando’l castellán na mesma llocución, pero nun-y dio la mollera pa entender que’l respetu poles llingües tien que ser daqué sentío y non una necesidá política como asocede nesti casu. Eso ye lo que paez tendrá de soportar l’asturianu mentantu nun algame la oficialidá: el escaecimientu constante del derechu de los asturianos y les asturianes a que la so llingua tenga los drechos que la Constitución afita pa toles llingües y qu’a la de nueso se-y quitara na Transición.

El Grupu Socialista, Sumar, Esquerra, Junts, EH Bildu, la PNV, el BNG y Coalición Canaria volvieron sumar los sos 179 escaños na votación definitiva de la reforma del reglamentu del nuevu Congresu plurilingüe. Y, nesta ocasión, otru escañu aislláu alzó la cifra hasta los 180 síes. En contra, el PP y Vox quedáronse en 170 noes a les iniciativa. Esta mayoría absoluta ye l’aritmética parlamentaria que Pedro Sánchez confía en reeditar pa la so nueva investidura como presidente del Gobiernu, dempués de que la próxima selmana fracase, como ta previstu, la investidura d’Alberto Núñez Feijóo.

La ultraderecha de Vox quedóse sola na defensa previa de la so enmienda a la totalidá contra la propuesta de reforma del reglamentu del Congresu. Solo los 33 diputaos de Santiago Abascal votaron a favor de la enmienda de Vox. El Partíu Popular nun los sofitó, sinón que s’abstuvo.