Morrió l’escultor asturianu Joaquín Vaquero Turcios

El célebre artista asturianu ñaciere en Madrid en 1933 y taba nos últimos tiempos trabayando nel diseñu de la nueva cubierta del Estadiu d’El Molinón, de Xixón. Ayeri, a les cinco la tarde, y dempués de sufrir una llarga enfermedá morría na so residencia de Santander. Arquitectu, pintor, escultor… una obra bien polifacética de la qu’una parte pue disfrutase n’Asturies. Actuó coles sos obres sobre les centrales hidrollétriques de Grandas y Tanes, nes oficines del Insalud n’Uviéu, n’autopista “Y”, onde instaló una escultura de grandes dimensiones que nomó “Cauce” y que los asturianos rebautizaron como “El cuélebre”; o en Xixón, onde la so escultura “Nordeste” domina’l costáu oeste de Cimavilla. Anque hai munches más repartíes pel territoriu’l país.

Entamó nel mundu la pintura de la mano del so pá, Joaquín Vaquero Palacios, artista asturianu que lu venceyó a esti país dende bien neñu. Estudió arquitectura en Roma (1950-57). En 1953 fizo la so primer esposición, na galería Giardino de Lugano y nel 55 espondría per primer vegada en Madrid. Participó nes EXPO de Bruseles y York, y les sos obres-y valieron ser nomáu miembru de l’Academia de Florencia. La so obra ta presente nos principales museos del tol mundu, como’l Reina Sofía y la Fundación Juan March, en Madrid, el Centru Pompidou de París, el Muséu del Vaticanu y el Jean Modern Art de Locarno (Suiza), ente otros.

En Madrid, dirixó la restauración del Teatru Real y creo’l Monumentu a Afayu d’América na Plaza de Colón. Tamién foi maestru asociáu de la Facultá de Belles Artes de la Universidá Complutense y espublizó dellos llibros sobre técniques de pintura paleolítica.