Mazana y sidra n’Asturies, protagonistes de la conferencia de mayu nel Botánicu

Esti xueves 19 de mayu, a les 19.00 hores, col títulu Evolución ya importancia de la producción de mazana y de sidra n’Asturies, Emilio Martínez Argüelles va esplicar la realidá de la producción de mazana y sidra nel nuesu país, y les amenaces y los retos d’esti sector, clave na economía del campu asturiano.

España ye’l cuartu país européu en producción de sidra: el 80% d’esta producción tien llugar n’Asturies. Un datu qu’evidencia cómo la producción de mazana y sidra ye, na actualidá, un motor perimportante de la economía rural asturiana. Conocer la hestoria de la producción de mazana y la sidra n’Asturies, cuálos son los métodos actuales d’ellaboración, los tipos de sidres esistentes y otros derivaos de la mazana, va dexanos entender un pocu meyor cómo nuesa rexón asítiase a la cabeza de la producción de sidra n’Europa.

Garantizar y ameyorar esta producción implica, ente otres coses, conocer cómo funcionen los plantíos esistentes, cuálos son los sos requerimientos y qué tipu de manexos riquen, según entender que la correcta polinización de el pumares y la calidá de la producción van de la mano.