Harley Quinn, l’archienemiga de Batman, va tener la so película

L’estudiu Warner Bros prepara una película sobre la figura de la villana Harley Quinn, un papel que va interpretar l’actriz Margot Robbie. La célebre enemiga de Batman yá va participar n’Escuadrón Suicida, película sobre los grandes villanos de DC Comics que se va estrenar n’agostu.

Según publicó esti martes la edición dixital de The Hollywood Reporter, nun se trata d’un proyectu centráu puramente en Harley Quinn, unu de les clásiques enemigues de Batman, sinón que van apaecer otros héroes y villanos de DC Comics como Batgirl y Birds of Prey.

Lo que se conoz hasta agora ye que la cinta, dirixida por David Ayeri, va cuntar con Robbie como protagonista y tamién como productora. DC Comics presentó apocayá una llínea de tires na que’l pesu recai sobre los costazos de personaxes como Quinn, Batgirl, Poison Ivy, Katana (que tamién apaez en Suicide Squad) y Bumblebe. El personaxe de Quinn foi creáu pol escritor Paul Dini y originalmente foi concebíu como una aliada y novia del Joker, el gran enemigu de Batman.

Will Smith, Joel Kinnaman, Jared Leto, Cara Delevingne y la mesma Robbie encabecen la repartida d’Escuadrón Suicida, un filme centráu en dalgunos de los antihéroes más conocíos de DC Comics que deciden trabayar pal Gobiernu de EE UU en misiones d’altu riesgu en cuenta de conmutar parte de les sos condenes.