La Factoría Rock Fest torna con un cuádruple conciertu

Tres la incertidume de la pandemia, y un añu d’ausencia, l’asociación Valliniello Sound City y la conceyalía de Cultura d’Avilés recuperen unu de los altavoces de la música más cañera na ciudá, cola vuelta de la Factoría Rock Fest. Un cuádruple conciertu, cola participación de cuatro bandes, dos asturianes y dos foriates esti sábadu 4 de febreru na Factoría Cultural a les 20 hores.

A la sala escénica del centru cultural del Carbayedo van xubise los avilesinos Leather Boys, que tornen al festival cinco años dempués, embarcaos na xira de promoción de la so “Born & Reborn in the Seventies”; los mierenses Swap; los valencianos Pölvora, y los vascos Midnight Road. Estos dos últimos van presentar, per primer vegada n’Asturies, y en rigorosu directu, los sos más recién trabayos discográficos, “Fueu y Ceniza” y “Ready for the fight”, respectivamente.

En conmemoración de la quinta edición retómase’l formatu orixinal de festival, nel que cuatro grupos xuben al escenariu. Un espectáculu que nun va dexar indiferente, presentáu la selmana pasada por Yolanda Alonso, conceyala de Cultura y Promoción de la Ciudá d’Avilés, acompañada por Luismi Díaz, presidente de Valliniello Sound City y miembru de Leather Boys; Julen Fernández, guitarrista de Swap, y Alberto Larralde y Sara Rus, integrantes tamién de Valliniello Sound City.

Alonso estimó “el trabayu incansable, l’actividá constante de Valliniello Sound City por esquizar iniciatives novedoses en favor de los músicos d’Avilés, a les que tratamos d’ufiertar espacios d’espresión, por entamar espectáculos que nos traen tamién a bandes qu’espunten fora de les nueses fronteres asturianes, coles que compartir y arriquecer la creatividá local, y col oxetivu siempres presente de da-y al públicu la meyor música”.

Más información