Portada Plástiques La Factoría Cultural participa na IX Feria Nacional de Cerámica Creativa CER.0.9 d’Uviéu

La Factoría Cultural participa na IX Feria Nacional de Cerámica Creativa CER.0.9 d’Uviéu

by redacción asturnews

La Factoría Cultural d’Avilés participa un añu más na Feria Nacional de Cerámica Creativa d’Uviéu, CER.0.9, que cumple la so novena edición. Failo cola obra de dos de los sos alumnos, Roberto Cuervo Arango y José Ángel García Martínez, que podrá vese dende esti vienres 23, hasta’l domingu 25 d’abril na Sala de Trascorrales.

La Factoría cunta na Feria con un stand propiu, col trabayu de dos de los alumnos que formen parte del grupu de Proyectu Personal na Escuela Municipal de Cerámica, y cunten con un gran percorríu na so trayectoria profesional.

Roberto Cuervo Arango va esponer parte de la so obra creativa, na qu’interpreta distintos edificios históricos d’Avilés, toos ellos cola técnica de “Gres con Chamota”, en distintos tamaños y coloriaes con pigmentos. Asina, va amosar representaciones del Conceyu d’Avilés; la casa que la tradición señala como de Pedro Menéndez, antigua Escuela de Cerámica y güei parte del Muséu de la Hestoria Urbana; el Palaciu de Valdecarzana o Casa de les Baragañas; el Palaciu de Camposagrado; el Palaciu de Llanu Ponte o Casa de García-Pumarino, y la portada de la Ilesia de los Franciscanos, l’edificiu más antiguu de los que se caltien na ciudá.

Nel casu de “Palos de Marea”, José Ángel García Martínez realiza escultures cerámiques en gres blancu que colorea con pigmentos. Nelles, asemeyando los palos que les marees depositen nes mariñes, representa fundamentalmente animales, con una referencia especial pol caballu en distintes postures. Espón les obres Empinada”, “Pastiando”, “Cabeza de caballu” y “Llevantando’l vuelu”, amás d’una serie de maquetes, tamién en gres, pero en pieces de pequenu formatu.

La visita a la Feria CER.0.9, na sala de Trascorrales, asitiada na plaza d’Uviéu del mesmu nome, ye gratuita, y puede realizase n’horariu de 11.00 a 15.00 y de 16.30 a 21.00 hores, hasta’l domingu. Va Dexar contemplar una serie de pieces úniques, de gran calidá técnica y artística.

Tamién te podria gustar