Entregáronse los premios del IV Concursu de Semeyes “La Sidra”

El pasáu 20 de xineru, celebróse la entrega premios del IV Concursu de Semeyes “La Sidra”, na xixonesa Sidrería La Galana. Nel mesmu actu inauguróse la Esposición de Semeyes del IV Concursu Semeyes La Sidra, na que s’ esponen les venti meyores semeyes seleicionaes pol xuráu del concursu. La esposición permanecerá na Sidrería La Galana demientres dos meses.

Nesti actu recibieron premiu Javier Broto Hernández, pola so obra “Criación” (na semeya de la noticia), Joaquín D. Palazón por “Igartubeiti” y Mónica González Álvarez por “Un culín de sidra”. Los premios tan dotaos con 600, 350 y 150 euros respeutivamente más una dotación en llibros de temática sidrera por valor de 150 € pa caún d’ellos. Tamién s’entregó un premiu especial consistente en dos caxes de sidre J.R a Ángel Febrero, pola so semeya “De sidra por Xixón”, por ser la meyor semeya seleicionada ente aquellas qu’amosaben la imaxe del Llagar J.R, patrocinador del concursu.

Los organizadores destacaron l’ ésitu de convocatoria del IV Concursu de Semeyes “La Sidra” al que se presentaren “más de 160 fotógrafos con ná menos que 744 semeyes. Amás, anque la participación foi mayoritariamente asturiana, hai obres presentaes de tol estáu, d’ Europa y d’América llatina”, apuntando como curiosidá que per primer vegaga se cunta “con participación rusa”.

El Concursu Semeyes “La Sidra” ta entamáu pola revista LA SIDRA y cuenta cola collaboración del Llagar J.R – Altu L’Infanzón.