El Teatru espérate n’Uviéu esti 2023

El presidente la Fundación Municipal de Cultura, el conceyal José Luis Costielles presentó esta mañana’l ciclu “El TEATRU espérate en 2023″, acompañáu del so director artísticu, Luis Vigil. Esti programa va arrincar esti próximu sábadu, 21 de xineru, nel Teatru Filarmónica con “¿Cuándo vien Samuel?” y va estendese hasta’l 3 de xunu, con un total de dolce títulos, que van tener llugar nel Campoamor y na Filarmónica. Les entraes yá tán a la vienta n’entraes.oviedo.es.

“Cola ufierta que tenemos per delantre en próximos meses, podemos dicir que n’Uviéu siguen pasando munches coses no cultural y que esta ciudá nun fuelga cuando se trata d’atraer nueves actividaes para tolos públicos. Enllenar Uviéu d’una ufierta cultural al altor de la capital ye lo que tamos tratando de faer nesti 2023, por casu, presentando lo que güei nos ocupa. Un cartelu de teatru de xineru a xunu que nun tien nada qu’envidiar a la ufierta de ciudaes que nos cuadriplican el presupuestu”, aseguró Costielles.

“El teatru espérate”, n’opinión del edil, “ye’l gabitu col que queremos atraer a los apasionaos de la dramaturxa a les funciones que programamos ente xineru y xunu. Y tamién a los que nun son el públicu tradicional del teatru, a los qu’animamos a participar nesta programación que diseñó con mimu’l director artísticu Luis Vigil con una bien curiosa selección de títulos y compañíes que van dir pasando poles tables del Filarmónica y del Campoamor a lo llargo de los próximos seis meses. Uviéu va poder esfrutar d’obres clásiques, de producciones innovadores y rompedores, d’adaptaciones de películes al teatru y de munchos títulos enfocaos al esfrute en familia, teatru pa neños y adultos, daqué no que siempres quixímos incidir a lo llargo d’esti mandatu. Uviéu yera xuna ciudá que precisaba un xiru de 180 graos nuna ufierta d’ociu familiar prácticamente inesistente, y creo que dimos bona amuesa de que yera posible faelo y con ciclos como ésti queda patente”.

El director artísticu d’esta actividá, Luis Vigil, detalló les obres y compañíes participantes. “El programa esta llenu de pequeños afitaos. Consiguimos un semestre completu con dalguna actividá escénica, daqué que nun sé dende cuando nun pasaba. Anguaño dos compañíes cumplen 40 años y xuntes suman 140 años d’artes escéniques”.
“L’espectáculu más senciellu, más interesante y más familiar llega esti sábadu” con “¿Cuándo vien Samuel?”, “xuna reflexón sobro’l tiempu y espaciu a partir de cinco años, un gran platu fuerte”, indicó Vigil, de la qu’esclarió que l’espectáculu foi Premiu Fetén, Premiu Assitej y la compañía, recibió un premiu nacional.
Toles obres y compañíes en www.oviedo.es/teatro