Blanca Fernández foi la pregonera de la XXVII Fiesta de la Oficialidá

La pregonera de la XXVII Fiesta de la Oficialidá de la Llingua Asturiana va ser Blanca Inés Fernández Quintana (El Capellán, 1994). Blanca ye graduada n’Estudios Clásicos y Románicos y especialista en Llingua Asturiana pola Universidá d’Uviéu y exerce como docente na Educación Secundaria Obligatoria, trabayu que compaxina cola escritura.

Al ufiertá-y ser la pregonera d’esti añu l’Ayuntamientu Bimenes quiso reconocer la so trayeutoria como escritora, qu’entamó bien ceo y qu’afitó dafechu siendo tovía bien moza. Asina, en 2021 asoleyó la so primera novela, “L’home les caparines”, y ganó los premios Radagast de Lliteratura Fantástica, convocáu pola editorial del mesmu nome, cola obra “Trovadoresca” y el Xoven de Narrativa Enriqueta González Rubín, por “No que cinca los seres de lleenda”, convocáu pola Conseyería Cultura. En 2022 algamó’l premiu María Josefa Canellada de Lliteratura Infantil y Xuvenil”, tamién de la Conseyería Cultura, con “El cartafueyu d’alquimia. Amás, ta acabante de recibir un reconocimientu dende Italia, el Premiu Internacional Ostana Xoven 2023 «pol compromisu y constancia nel espardimientu y promoción del asturianu na so comunidá, creando y afitando la so propia voz na lliteratura asturiana pa la mocedá».

Asina que toes aquelles persones que queráis sintir les pallabres de la escritora yerbata Blanca Fernández podéis acudir el sábadu 1 de xunetu, a les 12’00 hores, a la Plaza de Miranda del Douro en Martimporra, onde participará nel actu institucional de la XXVII Fiesta de la Oficialidá apurriendo’l pregón. Sicasí, tamién vais poder facelo enantes: el miércoles 28 de xunu, a les 19’30 hores, va tar na Casa Cultura de Santuyano, dientro’l circuitu “Autores nel Camín 2023”, falando precisamente de la so última obra premiada y de la lliteratura de xéneru n’asturianu.