El mundu de la caricatura rinde honores a Vaclav Havel

Cientu trenta caricatures d’autores de treinta países, ente ellos México, Colombia, Costa Rica, España y Brasil, recuerden en Praga al expresidente y dramaturgu checoslovacu Vaclav Havel (1936-2011).

La esposición forma parte del certame “El mundu pinta a Havel”, qu’entama la Unión Checa de Caricaturistes. Un Havel que percuerre con remangu la cuerda floxa, upada pol símbolu de la victoria; un héroe de la nación, nuna xesta como la del patrón del país; un xugador con suerte, que tuvo nel momentu precisu nel llugar precisu pa trunfar, son dalgunos de les temes series con que foi pintáu l’ex xefe d’Estáu polos dibuxantes.

Tamién se recordó la so faceta d’apasionáu pol teatru, la so cobardura, o la so costume de roblar les cartes con un corazón.

Cada artista representa a la so manera al intelectual, primer xefe d’Estáu de la era poscomunista, pero “nun atopamos una sola caricatura que se burlle d’él, lo que ye amuesa de daqué”, destacó Radovan Rakus, presidente de los caricaturistes checos.

Asina, nun tonu más lliberal o candongueru, tamién apaez retratáu como animador panzudu -nun documental Havel usó pa sigo mesmu la espresión de erotomaniaco-; o arrodiáu de los llexendarios Rolling Stones, colos que trabó gran amistá.

L’amuesa ta abierta hasta’l 30 de setiembre na “Malonstranska Beseda”, un local de solera del centru de la ciudá onde Havel solía allegar de conxusta o a tomase una cerveza.