El llunes torna la IX Amuesa de Teatru Amateur d’Avilés

El Teatru Amateur torna a los Canapés col ciclu de seronda nel que se van a representar cuatro obres teatrales al cargu de distintos grupos asturianos y una compañía convidada d’Estremadura.

El Centru Cultural Los Canapés acueye esti llunes la primera de los cuatro representaciones teatrales correspondientes al segundu ciclu de la IX Amuesa de Teatru Amateur d’Avilés. Ente los meses de marzu y mayu d’anguaño tuvieron llugar los seis representaciones restantes d’esti ciclu, que pretende dar visibilidá al trabayu y el talentu de los grupos teatrales non profesionales de la rexón.

El grupu xixonés La Capacha va ser l’encargáu de llevantar el telón d’esta segunda fase de l’Amuesa cola obra “Metá y Metá”, una comedia, obra de Jordi Sánchez y Pep Antón, dirixida por Chus Prieto y José Luis Fernández, protagonizada por dos hermanos, fíos d’una madre egoísta y de padres distintos, que les sos vides tán llenes de problemes personales y aforfugos económicos que se veríen resueltos si pudieren partise l’heriedu de la so controladora madre.

La función va tener llugar esti llunes, 19 d’ochobre, a les 19 hores, nel Teatru Los Canapés, con entrada gratuita, al igual que pa los trés obres restantes, que van tener llugar nel mesmu horariu y escenariu.

El llunes 9 de noviembre, la compañía llangreana Teatru Kumen va llevar a escena la so adaptación de la obra “Cena pa dos”, escrita por Santiago Moncada y dirimida por Joserra López. El veteranu grupu escenificará una comedia sobre’l realcuentru de dos amigos maduros y vivíos que tienen la oportunidá de volver atopar l’amor y compartir los últimos años de la so vida.

El 23 de noviembre, tamién llunes, el grupu de teatru xixonés Telón de Fondu va representar  el drama “El Tíu Antonín”, una adaptación al cargu de Lluis Antón González del Tíu Vaina” de Chejov, dirixida por Sara García Rodríguez. Nesta ocasión, la obra trescurre nel interior d’una casona asturiana, a principios del sieglu XX, na que vive’l tíu Antonín cola so madre y la so sobrina Sonia.

A lo último, el sábadu 28 de noviembre va tener llugar la representación al cargu de la compañía convidada, que nesti casu ye la cacereña Maramba Teatru, que va representar “Acorada2”, de Manel Nofuentes, ganadora del X Premiu de Testos Teatrales Raúl Moreno. Baxo la dirección de Pedro A. Pencu, los actores Xema González y Javier Gutiérrez van dar vida a unos personaxes que les sos vides cruciar tres un estresante día marcáu por una nube d’iviernu.