Uviéu va xestionar el Mercáu de La Corredoria

La xestión del Mercáu de Abastos de La Corredoria va pasar a ser municipal al cien per cien. El conceyal d’Economía y Mercaos, Rubén Rosón esplicó que “na Xunta de gobiernu decidióse retirar el procesu de llicitación hasta agora vixente y que quedó vacante en según qué puestos y que pa munchos pequeños comerciantes facía inasumibles los costos de mantimiento, vixilancia, llegando a multiplicase casi por trés y algamando los 900 euros al mes”.

El conceyal  indicó que “el Conceyu va camudar les bases de los pliegos y la manera de xestión  del Mercáu, que va dexar de tar privatizada, porque entá pagando l’edificiu con fondos propios y europeos l’edificiu, hasta agora taba en manos d’una asociación de comerciantes del propiu mercáu, daqué bien lesivu”. Con esta nueva midida, indicó Rosón, “el Conceyu va pasar a asumir los gastos íntegros de caltenimientu y de xestión y va cobrase un pequenu canon a los comerciantes”.

Al respective de l’apertura del equipamientu, Rosón indicó que “esperamos que tea n’ochobre del añu que vien” y alvirtió que “el  fechu de llevar años zarráu provocó que tengamos que desembolsar en redol a los 60.000 euros pa reparar daños y pequenos furtos. D’equí p’arriba vamos tar vixilantes”.