Dos muyeres nos marxes nel estrenu de la comedia negra “Extrarradios”

L’alcuentru ente dos muyeres que lluchen por sobrevivir nuna sociedá que les arrequexa nos marxes. Asina empieza “Extrarradios”, l’estrenu absolutu col que conclúi’l trimestre de fechu n’Asturies en escenAvilés, que podrá vese esti vienres, 24 de marzu, nel Teatru Palacio Valdés a les 20.15 hores.

Esta función, de la compañía avilesina Piquero Producciones Teatrales, cierra coles mesmes el programa d’actividaes entamaes pola conceyalía d’Igualdá d’Avilés en conmemoración del Día Internacional de la Muyer, el 8 de marzu, en collaboración cola conceyalía de Cultura y Promoción de Ciudá.

Ye una obra que reivindica la llucha de les muyeres pola igualdá de derechos en tolos contestos, y que podrá vese de forma gratuita. Pa ello, dende’l llunes 20 de marzu, tan pudiendo retirase invitaciones na Casa de Cultura, un máximu de dos per persona hasta escosase, n’horariu de 9.00 a 14.00 y de 17.00 a 21.00 hores.

El testu, que’l so autor, el dramaturgu gallegu Eduardo Alonso, denomina como “la comedia de les muyeres desamparaes”, tien l’oxetivu de “convidar a la reflexón dende l’entretenimientu, xuna reflexón sobro les muyeres en situaciones precaries a les que la vida dexó de llau”.

Empobinada por Enrique Villanueva, les actrices María Piquero y Sara Domínguez encarnen a dos personaxes que s’atopen na parada d’un autobús. Dos muyeres alloñaes de les convenciones sociales, xuna méndiga alcohólica y xuna prostituta, que nun cunten con naide y nun cunten pa naide, que nun esperen nada, perdíes, camuflaes ente’l paisaxe.

Dos muyeres que se alían ensin establecer llazos d’amistá, nuna peripecia vital que xira escontra la comedia negra, dándo-yos voz y visibilidá.