El CMAE acueye les xornaes d’arte contemporaneo “Asturies, Arte Actual”

Una esposición amuesa del 12 de mayu al 9 de xunu, una selección d’obres d’artistes asturianos con una llínea cercana al mundu astractu, xeométricu y conceptual. Cuatro charres sobre’l panorama del arte actual y la presentación del catálogu de l’amuesa completen el programa d’estes xornaes, que se van desenvolver sol títulu de “La Forma del Conceutu”.

L’alcaldesa d’Avilés, Mariví Monteserín, y la concevala de Cultura, Yolanda Alonso, asistíen esti xueves 12 de mayu  a la inauguración de les xornaes d’arte contemporaneo “Asturies, Arte Actual”, que se van desenvolver nel Centru Municipal d’Arte y Esposiciones (CMAE) hasta’l 9 de xunu.

Una esposición, cuatro conferencies y la presentación del catálogu de l’amuesa componen el programa d’estes xornaes que fueron entamaes col propósitu de sofitar a el ceadores qu’apuesten pol arte contemporaneu na rexón, contribuyendo a conceptualizarlo por aciu les distintes charres y meses redondes, y poniendo de manifiestu l’altu nivel qu’esti arte ta algamando n’Asturies. Per otru llau, les xornaes busquen potenciar el CMAE como centru de referencia pal arte contemporaneo.

L’amuesa que centra les xornaes va permanecer espuesta hasta’l 9 de xunu, y ta compuesta por una cuidada selección d’obres d’artistes asturianos que caltienen una llínea creadora cercana al mundu astractu, xeométricu y conceptual. Concretamente, podrán contemplase obres de Fernando Alba, María Álvarez, Irma Alvárez-Laviada, María Braña, Maite Centol, Isabel Cuadráu, Mónica de Juan, José Ferrero, Jorge Flórez, Lisardo, Eugenio López, Adolfo Manzado, Pablo Maojo, Paco Naide, Blanca Priendes, Elena Rato, María Jesús Rodríguez, Bernardo Sanjurjo y Carlos Suárez.

Per otru llau, cada xueves ente’l 19 de mayu y el 9 de xunu, el CMAE va acoyer una de les cuatro charres programaes pol profesor d’Hestoria del Arte y comisariu de les xornaes, Santiago Martínez.  El calter singular de les Xornaes d’Arte Actual, la so importancia y trescendencia van quedar afiguraes nun catálogu d’altu nivel formal y conceptual. Un documentu que va atestiguar l’apueste del Centru Municipal d’Arte y Esposiciones d’Avilés pol arte contemporaneu. Dicha publicación, diseñada por Manuel Fernández, va ser presentada’l xueves 2 de xunu, a les 19:30 hores, n’el mesmu CMAE.