Aprobada la reordenación de les colecciones del Muséu del Prado y Reina Sofía

La Comisión Mista de los Museos Nacionales del Prado y Reina Sofía, presidida pol secretariu d’Estáu de Cultura en funciones, José María Lassalle, aprobó esti martes la reordenación de les colecciones de dambos centros, qu’afecta a un total de 886 obres, según informa’l Ministeriu d’Educación, Cultura y Deporte nun comunicáu.

D’esta forma, correspuenden a les colecciones adscrites al Muséu Nacional del Prado les obres d’autores que la so fecha de nacencia sía anterior a la fecha de nacencia de Pablo Ruiz Picasso -1881- y al Muséu Reina Sofía les obres d’autores posteriores a esta fecha.

Esti criteriu cumple col mandatu del Real Decreto 410/1995, de 17 de marzu, sobre Ordenación de les colecciones estables del Muséu Nacional del Prado y del Muséu Nacional Centru d’Arte Reina Sofía, qu’establez como esceiciones les obres de 31 autores que, anque nacieron antes de 1881, participaben de la modernidá y pollo fueron asignaos al Muséu Reina Sofía. Ente ellos, atópense nomes como Anglada Camarasa, Nonell, Darío de Regoyos o Zuloaga.

Toos ellos son pintores y escultores representativos de les corrientes artístiques que yá coesistieren col impresionismu, que tuvieron relación colos enclinos postimpresionistas y colos movimientos intelectuales qu’arrinquen de 1898. Por ello, d’esta forma, el Muséu del Prau termina’l so discursu cola renovación del paisaxe y naturalismu de finales del sieglu XIX, representada n’obres de Beruete, Pinazo y Sorolla.

La ordenación aprobada afecta a un total de 886 obres. D’elles, un total de 853 pasen a ser adscrites al Prado: 423 pintures, 89 escultures, 92 pieces d’Artes Decoratives, 135 dibuxos y 57 estampes, según la xestión de 57 obres identificaes que siguen sumíes (44 pintures, 12 escultures y 1 dibuxu), una situación heredada de la xestión de les instituciones extintas qu’enantes fueron les sos custodies.

Pela so parte, el Muséu Reina Sofía recibe la adscripción de 33 obres: 3 pintures, 1 escultura, 1 dibuxu, 26 estampes y 2 pieces d’artes decoratives que se van caltener como depósitu nel Muséu del Prau.

Según señaló’l Ministeriu, esta propuesta respuende a una “refecha revisión” de los fondos de dambos museos y a un “rigorosu control d’inventarios”, que traxo un “fondu procesu d’analís, documentación ya investigación” de les colecciones per parte de dambos museos.