Teatru del Norte y Cecilia Hopkins homenaxen a Lorca en La Pola

La compañía sierense Teatru del Norte y l’actriz arxentina Cecilia Hopkins collaboren nuna coproducción que fai un sentíu homenaxe a Lorca y que se va poner n’escena esti martes 13 d’avientu, a les 20 hores, nel Teatru Auditoriu, con entrada llibre, llindada al aforu de la sala.

1926: Llámome Federico García y vengo apurri-y esta obra qu’escribí pa usté. Llámase “Mariana Pineda”.  Y gustaríame enforma que pudiera lleela. 1936: Yo quedo ente los muertos, yo voi cantando’l mio cantar inmenso. Canto’l cantar de quien callen, de quien muerren. Quedo equí col mio cantar y col mio lloru. Non, non te quiero besar, Margarita, nun quiero pensar que nunca más te voi ver. Ente estos diez años trescurre la relación del poeta Federico García Lorca y la gran actriz Margarita Xirgu. Diez año de vida, d’amistá y de teatru. Diez año nos que Xirgu estrena dalguna de les obres más importantes de Lorca.

Pero la sublevación del xeneral Franco rompió pa siempres esta relación teatral. Federico sumió pa siempres, por orde militar, de la mente de el españoles. Tamién pa siempres y por imperativu militar, Margarita perder nel inmensu continente suramericanu.

Dos almes ximielgues perdíes na nada, pa siempres. Y de eso trata esti espectáculu. De los alcuentros imposibles en Bonos Aires ente Federico y Margarita. Alcuentros que nunca se producieron, pero qu’equí se quieren imaxinar y suañar.

Dramaturxa y dirección: Etelvino Vázquez
Intérpretes: Cecilia Hopkins y Etelvino Vázquez
Coreografía: Cecilia Hopkins (Arxentina)
Espaciu sonoru: Nicolás Cardoso (Arxentina)
Vestuariu: Milena Machado (Arxentina)