Les “Canciones de Xixón” de Carlos Rubiera enllenaron el Teatru Xovellanos

L’Autor de «La Capitana» y de tantos otros ésitos y ún de los representantes principales del llamáu Nueu Canciu Astur, Carlos Rubiera, enllenó’l Teatru Xovellanos de Xixón de los cantares del so discu últimu, «Canciones de Xixón», un trabayu dedicáu a la villa y conceyu que lu vio ñacer.

Dientro de los actos del Festival de la Pallabra, abrió Rubiera esti vienres un recital nel que presentó les canciones del discu nuevu, dalgún de les sos canciones clásiques y otres composiciones nueves coles que sorprendió al numberosu públicu qu’asistió al conciertu nel coliséu xixonés.
Amás de les «Canciones de Xixón», Rubiera tuvo acompañáu por Mari Luz Cristobal Caunedo, qu’amás de cantar col cantautor, fízolo en solitario con una composición que Rubiera ficiera pa ella. El cantautor Rafa Lorenzo participó tamién nel conciertu cantando xunto al protagonista de la nueche dellos cantares, ente ellos un dúu de «Semos de Pumarín», una de les composiciones del discu nuevu de Rubiera.
Rubiera sorprendió al públicu con una composición infantil, interpretada por cinco de les sos escolines nel Colexu El Bosquín, onde ye maestru de música y llingua asturiana.
Carlos Rubiera tuvo arropáu tol conciertu por una orquestación formada por dalgunos de los meyores músicos d’Asturies, como’l pianista Gabino Antuña, coristes y un públicu entregáu qu’acompañó al cantautor con ánimu nes cuasi dos hores d’espectáculu musical qu’acabó cola interpretación de La Capitana, un llargu aplausu y un par de canciones a mou de bis.