L’Agrupación Municipal Socialista d’Uviéu aprueba la candidatura pa les prósimes elecciones municipales.

La candidatura encabezada, pola actual Directora Xeneral de Formación Profesional del Gobiernu d’Asturies, Paloma Sainz lleva como númeru dos al Secretariu Xeneral de los socialistes uveínos, Alfredo Carreño. La candidatura de Sainz recibió cerca d’un 80% de los votos de los afiliaos socialistes carbayones.

La llista, en pallabres d’afiliaos socialistes, representa a les corrientes socialistes de la capital del país, “axuntándoles alredor d’una candidata que recuperará l’alcaldía d’Uviéu”.

La candidata socialista entamó la so campaña col llanzamientu d’un blog nel qu’amuesa les sos impresiones sobre los más diversos temes, venceyaos a la política municipal, asina como nos que s’ufren les sos visites y participaciones nos actos nos que vien participando dende la so proclamación como candidata.
L’aparición d’esti espaciu personal de Paloma Sainz fizo que l’alcalde d’Uviéu, Gabino de Lorenzo, publicare la so páxina personal.

Cola aprobación por parte de l’agrupación socialista d’Uviéu de la candidatura de Paloma Sainz se pesllen les candidatures de los partíos con representación na Casa Conceyu de la capital asturiana.
Pel llau del Partíu Popular, actualmente nel gobiernu, Gabino de Lorenzo repetirá con una llista na que destaca la presencia del empresariu asturianista Xosé Suárez Arias-Cachero “Felechosa, na que tamién participa l’antiguu conceyal socialista Alberto Mortera. L’agrupación uvieína d’Izquierda Xunida volverá a presentar a los actuales conceyales Roberto Sánchez Ramos y a Celso Miranda como cabeces de llista a l’alcaldía d’Uviéu, a la espera de ratificar la candidatura énte la posibilidá d’aliances con otres fuerces polítiques que podríen modificar la llista del grupu d’izquierdes.